Украинанинг бугун, 13 июлга ўтар кечаси амалга оширган дрон ҳужумлари оқибатида Россиянинг бир неча ҳудудида камида 4 киши ҳалок бўлди, яна 5 киши жароҳатланди. Бу ҳақда “The Moscow Times” хабар берди.
Москва вилояти губернатори Андрей Воробьёвнинг билдиришича, энг оғир ҳужум пойтахтдан қарийб 40 километр ғарбда жойлашган Пионерский қишлоғида содир бўлган. Оқибатда 3 киши ҳалок бўлган, бир нечта хонадонда ёнғин юзага келган.
Губернаторга кўра, Москва атрофидаги ўндан ортиқ шаҳар ва қишлоқ ҳам тунги ҳужум нишонига айланган. Россия ҳаво ҳужумидан мудофаа кучлари Москва вилояти осмонида 81 та дронни уриб туширган.
Москва мэри Сергей Собянин 12 июль оқшомидан буён Москва ва унинг атрофидаги ҳудудлар узра 350 та Украина дрони аниқланганини маълум қилган. Унинг айтишича, уларнинг аксарияти тутиб қолинган, шаҳар ҳудудида эса талафот ёки вайронагарчилик қайд этилмаган.
Тунги ҳужумлар сабаб Москванинг тўртта йирик аэропортида парвозларга вақтинчалик чекловлар жорий этилган. Кейинчалик аэропортлар иш фаолиятини тиклаган. Белгород вилоятида дрон ҳужуми оқибатида бир аёл ҳалок бўлган.
Ставрополь ўлкаси губернатори Владимир Владимировнинг маълум қилишича, дрон зарбаси оқибатида “Роснефть” нефть базаси жойлашган қишлоқдаги саноат зонасида ёнғин чиққан.
Россия Мудофаа вазирлиги маълумотига кўра, 13 июлга ўтар кечаси Россия ҳудудлари ва аннексия қилинган Қрим узра жами 342 та Украина дрони тутиб қолинган.
