Ямандаги ҳусийлар ҳаракати Саудия Арабистони назоратидаги ҳудудга ракета ҳужуми уюштирди. Бу 2022 йил март ойида кучга кирган норасмий сулҳдан кейин ҳусийлар томонидан Саудияга қарши амалга оширилган илк ҳужум бўлди. Бу ҳақда “Reuters” хабар берди.
Ҳусийлар Саудия Арабистонини ўзлари назоратидаги аэропортни бомбардимон қилганликда айблаб, кеча, 13 июль куни қиролликка ракета ҳужуми уюштирган. Бу эса Саудия ва Эрон қўллаб-қувватлайдиган ҳусийлар ўртасида тўрт йил давом этган нисбий тинчликни бузди.
Саудия бошчилигидаги ҳарбий коалиция вакили Х ижтимоий тармоғида қироллик жанубий ҳудудига қарата учирилган “террорчи ҳусийлар милицияси” ракеталари ҳаво мудофаа тизимлари томонидан йўқ қилинганини маълум қилган. Саудия ҳукумати эса ушбу воқеалар юзасидан ҳозирча расмий изоҳ бермаган.
Ҳусийлар ҳарбий вакили Яҳё Сареънинг айтишича, нишон Саудиянинг Яман билан чегарадош тоғли жанубий вилояти маркази Абҳа шаҳридаги халқаро аэропорт бўлган.
Ҳусийлар 13 июль куни эрталаб Саудияни Сано халқаро аэропортини ҳаводан бомбардимон қилганликда айблаб, буни “очиқ агрессия” деб атаган ва деэскалация даври якунланганини билдирган. Шунингдек, улар Сано аэропортига қўйилган “қамал” бекор қилинмагунча авиакомпанияларни Саудия ҳаво ҳудуди орқали парвоз қилмасликка чақирган.
Сано аэропортига берилган зарбаларни Саудия томонидан қўллаб-қувватланадиган ва халқаро ҳамжамият тан олган Яман ҳукумати ўз зиммасига олган. Яман Мудофаа вазирлигининг маълум қилишича, Эрон самолёти мамлакат суверенитетини бузган ҳолда қўнишининг олдини олиш мақсадида Сано халқаро аэропорти учиш-қўниш йўлаги нишонга олинган.
Вазирлик мамлакат ҳаво ҳудудини бузган ҳар қандай душман самолётига қарши “барча мавжуд воситалар” билан жавоб қайтарилишини билдириб, бу ҳолат учун Эронни масъул деб атаган.
