Ўзбекистонда биринчи марта криптовалюта майнинги фаолиятини амалга ошириш учун рухсатнома берилди. Бу ҳақда “Spot” Истиқболли лойиҳалар миллий агентлигининг майнинг фаолияти учун рухсатномалар электрон реестрига таяниб хабар берди.
Маълум қилинишича, 19 январь куни ILMA директорининг буйруғи билан NexaGrid компаниясига майнинг билан шуғулланиш ҳуқуқи берилган. Фаолият манзили сифатида Бухоро вилоятининг Ромитан тумани кўрсатилган. Бу рухсат мамлакатда ушбу йўналишда берилган илк ҳужжат ҳисобланади.
Юридик шахс сифатида 2025 йил апрель ойида Тошкент шаҳрида рўйхатдан ўтган NexaGrid’нинг устав фонди 600 миллион сўмни ташкил этади. Компания “компьютер ускуналарини бошқариш фаолияти” билан шуғулланади. Таъсисчилар — Тўймурод Султонов (63%) ва Маҳмуджон Рўзимуродов (37%). Султонов компания раҳбари сифатида ҳам кўрсатилган.
У LinkedIn’даги саҳифасида NexaGrid майнинг учун рухсатни “қонуний ва шаффоф тарзда” олганини таъкидлаб, лойиҳа қисқа муддатли манфаат эмас, балки Марказий Осиёда келажак инфратузилмасини шакллантириш мақсадида бошланганини қайд этди. Унинг профилига кўра, у 2017—2024 йилларда давлат хизматида ишлаган, кейинчалик хусусий секторда фаолият юритган.
Эслатиб ўтамиз, 2023 йил кузида ILMA майнинг фаолиятини лицензиялаш тартибини тасдиқлаган. Унга кўра, майнинг фақат юридик шахслар томонидан ва асосан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади. Ягона электр тармоғига уланиш мумкин, бироқ бунда электр энергияси учун икки баравар тариф қўлланади.
Рухсатнома 5 йил муддатга бепул берилади ва аризалар 15 кун ичида кўриб чиқилади. Яширин ва рухсатномасиз майнинг тақиқланади, олинган крипто-активлар эса фақат лицензияга эга крипто-биржаларда сотилиши мумкин. Ҳозирда мамлакатда 21 та крипто-хизмат провайдери фаолият юритмоқда, 2022 йилдан буён улар 107 миллиард сўмдан ортиқ бож ва йиғим тўлаган.
