Хитойлик олимлар паст Ер орбитасидаги сунъий йўлдошларни ишдан чиқаришга қодир микротўлқинли қурол яратди. Бу ҳақда South China Morning Post хабар берди.
Маълум қилинишича, қурилма TPG1000Cs деб номланади ва у Сиан шаҳридаги Шимоли-ғарбий ядро технологиялари институтида ишлаб чиқилган. Ускуна бир дақиқа давомида 20 гигаваттгача қувватга эга импулсларни ҳосил қила олади. Бу қувват сунъий йўлдошлар, жумладан, америкалик миллиардер Илон Маскка тегишли Starlink тизимини ишдан чиқариши ёки унга зарар етказиши мумкин.
Микротўлқинли қуролнинг узунлиги 4 метр, оғирлиги эса 5 тоннани ташкил этади. Нисбатан ихчам бўлган ушбу қурилмани юк машинасига, ҳарбий кема ёки самолётга, ҳатто космик аппаратга ҳам ўрнатиш мумкин. Бундай ускуна коинотда жойлаштирилган тақдирда, унинг таъсирини аниқлаш ва тўхтатиб қолиш қийин бўлади.
“Илгари шунга ўхшаш маълум бўлган тизимлар анча оғир бўлиб, уч сониядан ортиқ ишлай олмаган”, дейилади хабарда.
Янги Хитой қуроли ҳақидаги маълумотлар космосни ҳарбийлаштириш эҳтимоли тобора кўпроқ муҳокама қилинаётган бир пайтга тўғри келди. Февраль ойи бошида россиялик пропагандачи Владимир Соловёв давлатга қарашли “Россия 1” телеканали эфирида Starlink сунъий йўлдош интернетини “қонуний нишон” деб атаган эди. Бунга Илон Маск Украинадаги россиялик ҳарбийлар учун Starlink интернетидан фойдаланишни блоклагани сабаб бўлган. Соловёв Starlink тизимларини коинотда ядровий портлаш ёрдамида йўқ қилиш имкониятини кўриб чиқишни таклиф қилган.
Шу билан бирга, АҚШ Космик кучлари разведкасининг 2025 йил март ойидаги ҳисоботида Хитойнинг ҳарбий-космик салоҳияти кескин ошгани қайд этилган. 2015 йилдан буён Хитойнинг космик операциялари ҳажми 620 фоизга кўпайган, мамлакат ихтиёрида эса мингдан ортиқ сунъий йўлдош мавжуд. Шунингдек, Хитой Халқ озодлик армияси космик операцияларни эҳтимолий минтақавий можарони тийиб туриш воситаси сифатида кўриши мумкинлиги таъкидланган.
