Хитой ўз мамлакатидаги компанияларга Эрон нефти савдоси билан боғлиқ бўлган бешта Хитой нефтни қайта ишлаш заводига (НҚИЗ) нисбатан қўлланган АҚШ санкцияларига амал қилмасликни буюрди. Бу ҳақда “Bloomberg” хабар берди.
Нашрнинг ёзишича, Пекиннинг бу қарори Америка чекловлари оқибатларини юмшатишга қаратилган қадам. Маълумки, АҚШ ўтган ойда Hengli Petrochemical (Dalian) Refinery Co. нефтни қайта ишлаш корхонасига ҳамда яна бир қанча хусусий қайта ишлаш компанияларига қарши санкциялар жорий этган. Ушбу чекловлар активларнинг музлатилишига ва битимлар тузишнинг тақиқланишига олиб келди.
Бугун, 5 май куни Хитой Савдо вазирлиги АҚШнинг ушбу чоралари учинчи давлатлар билан бўладиган нормал савдо-сотиқни ноқонуний равишда чеклашини ва халқаро меъёрларни бузишини маълум қилган. Шу муносабат билан, вазирлик АҚШ томонидан бешта компанияга нисбатан жорий этилган санкцияларни тан олиш, уларга риоя қилиш ва ижро этишни тақиқловчи фармон чиқарган.
“Хитой мамлакатдаги компанияларга Эрон нефти савдоси билан боғлиқ бешта Хитой НҚИЗларига қарши АҚШ санкцияларига амал қилмасликни буюрди”, дейилади вазирлик баёнотида.
Маълумот учун, жорий йид апрель ойи охирида АҚШ Хитойнинг нефтни қайта ишлаш заводларидан бирига, шунингдек, Эрон нефтини ташувчи ўнлаб кема қатнови компаниялари ва танкерларга нисбатан санкциялар қўллагани маълум бўлган эди. Орадан бир неча кун ўтиб, АҚШ Эроннинг “соядаги банк тизими”га алоқадор 35 нафар шахс ва тузилмага нисбатан ҳам санкциялар жорий этди. Бундан ташқари, Вашингтон Хитой НҚИЗлари билан ишлайдиган ва Ҳормуз бўғозидан ўтгани учун Эронга ҳақ тўлайдиган банкларни огоҳлантирди.
