Туркияда кучли бўрон ва жадал ёғингарчиликлар сабаб юзага келган ҳодисалар оқибатида 2 киши ҳалок бўлди ва 33 киши эса жароҳатланди. Бу ҳақда Табиий офатлар ва фавқулодда вазиятларни бошқариш бошқармаси хабар қилди.
Қайд этилишича, жорий йилнинг 3–4 май кунлари ноқулай об-ҳаво шароити туфайли мамлакатнинг 51 вилоятида момақалдироқли ёмғир, қор ёғиши ва кучли шамол сабаб “сариқ огоҳлантириш” эълон қилинган. “Сариқ” даражадаги огоҳлантириш берилган ҳудудларда жами 5 126 нафар ходим ва 2 049 та техника фавқулодда вазиятларга жавоб бериш учун сафарбар этилган.
Кучли шамол ва ёғингарчиликлар сабаб юзага келган ҳодисаларда 2 киши ҳалок бўлган, 33 киши жароҳат олган ва жароҳатланган фуқароларга тиббий ёрдам кўрсатилаётгани билдирилган. Ёпилиб қолган йўлларда автомобиль йўллари хизмати, вилоят махсус бошқармалари ва маҳаллий ҳокимлик жамоалари томонидан тозалаш ишлари давом эттирилмоқда.
