Чикагодаги федерал прокурорлар Қозоғистоннинг икки нафар фуқаросига Medicare дастури ва тиббий суғурта билан боғлиқ йирик фирибгарлик схемаларини ташкил этганлик айбловини қўйди. Тергов маълумотларига кўра, уларнинг ҳаракатлари оқибатида давлат дастурлари ва хусусий суғурта компаниялари 1 миллиард доллардан ортиқ зарар кўрган. Бу ҳақда CWBChicago хабар берди.
Айбланувчилардан бири Анвар Абдраҳмонов. У Кентукки штатида қонуний рўйхатдан ўтган Priority One Medical Equipment компанияси устидан назоратни эгаллаб олиб, ундан Medicare дастури доирасида сохта ҳисоб-китоблар тақдим этиш учун фойдаланганликда айбланмоқда. Айбловга кўра, 2024 йил мартидан августигача компания узлуксиз глюкоза мониторинги қурилмалари ва катетерлар учун қарийб 666 миллион долларлик ҳисоб-фактураларни юборган.
Суд ҳужжатларига кўра, Анвар Абдраҳмонов АҚШга 2023 йил май ойида ёзги иш визаси билан кирган, ушбу виза муддати ўша йил сентябрида тугаган бўлса-да, у мамлакатда қолишда давом этган. 2024 йил апрель ойида компаниянинг аввалги эгаси уни сотгач, Абдраҳмонов Priority One компаниясининг аъзоси ва менежери бўлган.
2024 йил майидан августигача Medicare Priority One компанияси бўйича қарийб 250 та шикоят олган. Нафақа олувчиларнинг кўпчилиги компаниядан ҳеч қандай маҳсулот ёки хизмат харид қилмаганини билдирган. Иллинойс штатидаги Medicare нафақахўрларидан олти нафари терговчиларга диабетга оид жиҳозларни буюртма қилмаганини ва олмаганини айтган, айримлари эса умуман диабет билан оғримаганини маълум қилган.
2024 йил июль ойида Кентуккидаги Priority One офисини кузатган терговчилар бино ёпиқ ва бўш кўринганини қайд этган. Ёлланган ходимлар уларнинг вазифаси фақат почта хатларини олиб, уларни шифрланган Telegram иловаси орқали шахсан ҳеч қачон кўрмаган раҳбарга юборишдан иборат бўлганини айтган. Суд ҳужжатларида FedEx орқали юборилган чеклар Чикаго атрофи манзилларига йўналтирилгани кўрсатилган. Ходимлардан бири компанияга берилган 1 миллион долларлик чекни йўқотиб қўйганини, кейинчалик у топилгач, 2 минг доллар миқдорида мукофот олганини билдирган.
Medicare 2024 йил июль ойида Priority One компаниясига тўловларни маблағлар тақсимлана бошланишидан олдин тўхтатган. Шу билан бирга, тергов маълумотларига кўра, Medigap суғурта компаниялари даъволар бўйича камида 450 минг доллар тўлаб берган. Молиявий ҳужжатлар Анвар Абдраҳмонов тахминан 182 минг долларни Гонконгдаги ҳисоб-рақамларга ўтказганини ва яна 200 минг доллардан ортиқ маблағни чет элга юборишга уринганини кўрсатади. 2024 йил августида у Priority One ҳисобига Medigap суғурта компанияларидан олинган қарийб 22,5 минг долларлик 30 та чекни ҳам киритган.
Иш бўйича иккинчи гумондор Чикаго ҳудудида яшовчи Тоир Смагул. У Medicare дастури билан боғлиқ фирибгарликдан олинган маблағларни ювиш мақсадида тил бириктирганликда айбланмоқда. Тергов уни Коннектикут штатидаги Medical Home Care Inc. компанияси билан боғлайди.
Прокуратура версиясига кўра, 2023 йил декабридан 2024 йил сентабрига қадар Тоир Смагул компанияни назорат қилган ва тиббий жиҳатдан зарур бўлмаган, кўпинча эса умуман етказиб берилмаган катетерлар ҳамда бошқа тиббий ускуналар учун Medicare ва Medigap дастурларига бутун мамлакат бўйлаб ҳисоб-фактуралар тақдим этиш схемасида иштирок этган.
Айблов хулосасига кўра, Medical Home Care 2023 йил майидан 2024 йил июнигача бўлган даврда қарийб 470 мингта даъво аризасини тақдим этиб, уларнинг умумий суммаси тахминан 953 миллион долларни ташкил этган. Шу вақт оралиғида Medicare суғурталанган шахслардан 27 мингдан ортиқ шикоят олган.
Терговчилар Medicare дастуридан нафақа олувчи 19 нафар шахсни, жумладан, Иллинойс штатидаги беш кишини сўроқ қилган. Уларнинг барчаси катетерлар олмаганини айтган. Ускуналарни буюрган деб кўрсатилган уч нафар тиббиёт ходими эса бундай буюртмаларни бермаганини ва кўрсатилган шахслар уларнинг беморлари эмаслигини билдирган.
Молиявий ҳужжатларга кўра, Medigap суғурта ташкилотлари 2024 йил январь–февраль ойларида Medical Home Care томонидан тақдим этилган сохта даъволар бўйича камида 854 минг доллар тўлаган.
Терговга кўра, Тоир Смагул Иллинойс штатида банкоматлар орқали бир неча бор нақд пул ечиб олган, шундан сўнг компаниянинг банк ҳисобларини ёпиб, фирибгарлик йўли билан олинган маблағларни чек орқали ўз шахсий ҳисобига ўтказган.
