Россия Федерациясига вақтинча ишлаш мақсадида борган Ўзбекистон фуқароси буйракда кузатилган оғир хасталик туфайли вафот этди. Айни пайтда марҳумнинг жасади моркда сақланмоқда.
Аниқланишича, 1982 йилда туғилган Р.Н. Россиянинг Москва вилояти, Клин шаҳрида жойлашган моркда вақтинча сақланмоқда. У ерда бўлиб турган ватандошлар таҳририятга мурожаат қилиб, марҳумнинг яқин қариндошларини топишда ёрдам сўради. Дастлабки маълумотларга кўра, фуқаро ўткир буйрак шамоллаши асорати оқибатида тахминан бир ҳафта олдин вафот этган.
Ҳолат юзасидан Ўзбекистон Республикаси Ташқи ишлар вазирлиги матбуот котиби Аҳрор Бурҳонов батафсил маълумот берди . Унинг сўзларига кўра, 24 декабрь куни марҳумнинг танишлари жасадни моркдан олиб чиқиш учун зарур бўлган ҳужжатларни шифохонадан қабул қилиб олган. Фуқаронинг укаси билан боғланилганда, марҳумнинг жасадини Россия Федерациясида дафн этилиши айтиб ўтилган.
