Озарбайжон президенти Илҳом Алиев унинг мамлакатининг Украинадаги дипломатик объектларига Россия қасдда зарбалар берганини айтди. Бу ҳақда сиёсатчи Украина президенти Владимир Зеленский билан учрашувдан сўнг маълум қилди.
Илҳом Алиевнинг сўзларига кўра, Озарбайжон элчихонаси уч марта ҳужумга учраган.
“Украинадаги элчихонамизга учта зарба берилди. Биринчи ҳужумдан кейин бу тасодиф бўлса керак, деб ўйладик. Кейин Россия томонига дипломатик ваколатхоналаримиз — консуллик бўлими, маданият маркази, элчихона координаталарини тақдим этдик. Шунга қарамай, яна иккита зарба берилди. Бу Озарбайжоннинг дипломатик ваколатхоналарига қарши мақсадли ҳужумдир”, деди Алиев.
Озарбайжон президентининг таъкидлашича, Москвага расмий нота юборилган, Россия элчиси эса Ташқи ишлар вазирлигига чақирилган. Озарбайжон раҳбари Россиянинг ҳаракатларини “нодўстона қадам” деб атади.
Россия Ташқи ишлар вазирлиги эса бунга жавобан айбловлардан “ҳайратда” эканини маълум қилди. Вазирлик зарбаларни режалаштиришда “тинч аҳолига зарар етказмаслик учун жанговар маълумотлар синчковлик билан текширилиши”, шунингдек, дипломатик ваколатхоналарнинг жойлашуви ҳисобга олинишини билдирди.
Ташқи ишлар идораси Озарбайжон томонига илгари барча зарур тушунтиришлар берилганини таъкидлади. Шунингдек, Россия ТИВ элчихона мажмуасига етган зарар “Украина қуролли кучларининг ҳаво ҳужумидан мудофаа тизими нотўғри ишлаши” оқибатида юзага келганини таъкидлади.
