Англиянинг “Ливерпуль” жамоаси ҳужумчиси Муҳаммад Салоҳ жорий мавсум якунида клубни тарк этишини эълон қилди. Бу ҳақда футболчи Instagram саҳифасида маълум қилди.
Мисрлик футболчи ижтимоий тармоқлар орқали қилган мурожаатида жорий мавсумдан сўнг “Ливерпуль” билан хайрлашишини маълум қилди. Эътиборлиси, у 2025 йил апрель ойида 2026-2027 йилги мавсум охиригача мўлжалланган янги шартнома имзолаган эди.
“Бу кун келишини истамасдим, аммо қарор қабул қилинди. Мавсум охирида мен “Ливерпуль”ни тарк этаман. Бу клуб, шаҳар ва мухлислар менинг ҳаётимнинг ажралмас қисмига айланди. “Ливерпуль” – бу шунчаки футбол клуби эмас, бу иштиёқ, тарих ва ўзига хос руҳдир. Бу ерда ўтказган вақтим давомида жамоадошларим ва мухлисларнинг қўллаб-қувватлашини ҳеч қачон унутмайман”, дейди Салоҳ ўзининг видеомурожаатида.
33 ёшли ҳужумчи 2017 йилдан буён “қизиллар” сафида тўп суриб келмоқда. У клуб билан икки бор Англия чемпионлиги, Англия кубоги, Лига кубоги, Чемпионлар лигаси, UEFA Суперкубоги ҳамда FIFA Клублар ўртасидаги жаҳон чемпионатида ғолиб чиққан.
Маълумот учун, Салоҳ жорий мавсумда барча мусобақаларда 34 та ўйинда майдонга тушиб, 10 та гол муаллифига айланган.
