Англиянинг “Ливерпуль” клуби ярим ҳимоячиси Райан Гравенберх фаолиятини Испания Ла Лигасида давом эттириши мумкин. Fichajes нашрининг хабар беришича, 23 ёшли футболчига “Барселона” жиддий қизиқиш билдирмоқда.
Хабарга кўра, нидерландиялик футболчини қўлга киритиш учун каталонияликлар раҳбарияти бир нечта асосий таркиб футболчиларини сотиш имкониятини ҳам кўриб чиқишга тайёр. Гравенберхнинг ўзи ҳам “Барселона”га ўтиш имкониятини инкор қилмаяпти. Ҳозирда “кўк-анорранглилар” футболчининг атрофидаги вазиятни диққат билан ўрганмоқда. Агар имконият пайдо бўлса, Райанни ўз сафига қўшиб олади.
“Ливерпуль” футболчининг келажаги бўйича ҳали бир қарорга келмаган, бироқ яхши таклиф тушса, музокара бошлаши мумкинлиги айтилмоқда. “Барселона” эса ярим ҳимоячи учун 50 миллион евро тўлашга тайёрлигини билдирган. Бу эса Гравенберхнинг каталониялик клубга ўтиш эҳтимолини оширмоқда.
Маълумот учун, жорий мавсум Райан Гравенберх барча турнирлар доирасида жами 12 та ўйинда майдонга тушиб, ўз ҳисобига 3 та гол ва 2 та голли узатма ёздириб қўйган. Transfermarkt портали маълумотига кўра, футболчининг бозор қиймати 90 миллион еврони ташкил қилади. Унинг “Ливерпуль” билан шартномаси 2028 йил ёзигача амал қилади.
