Англия терма жамоаси ҳамда “Ньюкасл” клубининг собиқ бош мураббийи ва икки карра “Олтин тўп” соҳиби Кевин Киганга саратон касаллиги ташҳиси қўйилди. Бу ҳақда “Ньюкасл” клуби матбуот хизмати хабар берди.
“Нюкасл” томонидан тарқатилган баёнотда айтилишича, Кевин Киган яқинда қорин бўшлиғида кузатилган оғриқлар сабаб қўшимча текширувлар ўтказиш учун шифохонага ётқизилган. Текширувлар натижасида унда саратон касаллиги аниқланган ва айни пайтда у даволанишни бошлаган.
“Кевин тиббий жамоага уларнинг қўллаб-қувватлаши ва доимий парвариши учун миннатдорлик билдирган. Ушбу қийин вақтда у оиласи ва шахсий ҳаётига оид маълумотларни ошкор қилмасликни сўраган ва бошқа ҳеч қандай изоҳ бермаган”, дейилади клуб баёнотида.
Маълумот учун, ҳозирда 74 ёшни қаршилаган Кевин Киган футбол тарихидаги энг кучли футболчиларидан бири саналади. У 1978 ва 1979 йилларда икки бор “Олтин тўп” мукофотига сазовор бўлган. Киган фаолияти давомида “Ливерпуль”, “Гамбург”, “Саутгемптон” ва “Ньюкасл” каби жамоаларда тўп сурган, шунингдек, Австралиянинг “Блэктаун Сити” клуби шарафини ҳам ҳимоя қилган.
Киган “Ливерпуль” сафида уч марта Англия чемпиони, икки марта Англия Суперкубоги соҳиби бўлган, шунингдек, UEFA кубоги, Германия кубоги ва Европа кубогини қўлга киритган.
Футболчилик фаолиятини якунлагандан сўнг, Кевин Киган мураббий сифатида “Ньюкасл”, “Фулҳэм”, “Манчестер Сити” клублари ҳамда Англия терма жамоасини бошқарган.
