Россиянинг нефть экспортидан тушадиган даромадлари 2022 йил февралидан бери энг паст даражага тушди. Ўтган ҳафта мамлакатнинг нефть экспортидан олган тушуми қарийб 959 миллион долларни ташкил этган. Бу кўрсаткич октябрь ойининг бошидаги даромадлардан тахминан 500 миллион долларга кам. Бу ҳақда “Bloomberg” хабар берди.
Таҳлилчиларга кўра, даромадларнинг кескин пасайишига асосий сабаб – санкциялар таъсирида Россиянинг Urals маркали нефтига берилаётган чегирмаларнинг кескин ошганидир. Аввал Brent эталон навига нисбатан чегирма 5–15 фоизни ташкил этган бўлса, ҳозирда у қарийб 50 фоизга етган.
Шунингдек, Россиянинг анъанавий сотув бозорларига кириш имкониятлари чеклангани ва логистика харажатларининг ошгани фонида нефть нархлари ҳамда даромадлар пасайишда давом этаётгани қайд этилган.
