Италиянинг ҳашаматли кийим-кечак гиганти Prada узоқ вақтдан бери кўз остига олиб юрган Versace брендини сотиб олиш жараёни ниҳоясига етганини маълум қилди. Бу ҳақда CNN хабар берди.
Prada 2025-йилнинг апрель ойида Versace’ни АҚШга тегишли Capri Holdings компаниясидан тахминан 1,3 миллиард евро (1,51 миллиард доллар) эвазига сотиб олиш бўйича якуний шартномани имзолаган эди. Ушбу харид, Capri’нинг Tapestry компаниясига сотилиши антимонополия органларининг қаршилиги туфайли бекор қилинганидан сўнг амалга ошган.
Prada эгалари Миучча Прада ва Патритcио Бертеллининг ўғли Лоренсо Бертелли ноябрь ойида Reuters’га берган интервьюсида интеграция жараёни тугаллангач, шахсан ўзи Versace’нинг ижрочи раиси лавозимини эгаллашини маълум қилганди. Унинг сўзларига кўра, Prada бу келишувга бир неча йиллардан бери интилмоқда.
“COVID даврида ҳам алоқада бўлганмиз, ҳатто Capri’нинг Tapestry’га сотилишидан олдин ҳам музокаралар олиб борилган. Ўша келишув антимонополия масалалари туфайли барбод бўлгач, биз жараённи тезлаштиришга ҳаракат қилдик. Бу узоқ вақтдан бери амалга оширилиши кутилаётган иш эди”, деган Лоренсо Бертелли.
Жанни Версачи томонидан 1978-йилда Миланда асос солинган ва ўзининг жозибали эстетикаси билан машҳур бўлган бу бренд энди Prada гуруҳи таркибига қўшилади. Маълумот ўрнида, Prada таркибида ҳозирда тез ўсиб, ривожланиб бораётган Miu Miu бренди ҳам бор. Бу харид Италия мода уйи учун кескин стратегик ўзгаришни англатади.
Шартнома эълон қилинишидан бир неча ҳафта олдин, яъни март ойида Донателла Версачи деярли ўттиз йиллик фаолиятдан сўнг ижодий директорлик лавозимини тарк этган эди. Унинг ўрнини Miu Miu’да дизайн директори бўлиб ишлаган Дарио Витале эгаллаган.
