Жиноят ишлари бўйича Ангрен шаҳар судида вояга етмаган қизга нисбатан зўравонлик ҳолати юзасидан кўрилган жиноят иши бўйича суд жараёни якунланиб, ҳукм эълон қилинди. Бу ҳақда Олий суд ахборот хизмати хабар берди.
Маълум қилинишича, суд жараёнида С.Қ. (2006 йилда туғилган), З.У. (2004-йилда туғилган), Д.Ў. (2004 йилда туғилган) ва А.У. (2003 йилда туғилган) вояга етмаган С.Й. (2010 йилда туғилган қиз)га нисбатан содир этилган жиноятлар бўйича айбли деб топилди. Жиноят-процессуал кодексининг 19-моддасига мувофиқ иш ёпиқ суд мажлисида кўриб чиқилган.
Эълон қилинган ҳукмга кўра, С.Қ. (жиноят содир этилган вақтда вояга етмаган) Жиноят кодексининг 118-моддаси 3-қисми “а” банди билан айбли деб топилиб, 10 йилга озодликдан маҳрум қилинди. З.У. Жиноят кодексининг 118-моддаси 3-қисми “а” банди, 119-моддаси 3-қисми “а” банди, шунингдек, 28, 118 ва 28, 119-моддалари билан айбли деб топилиб, 12 йилга озодликдан маҳрум этилди.
Шунингдек, Д.Ў. Жиноят кодексининг 118-моддаси 3-қисми “а” банди ва 119-моддаси 3-қисми “а” банди билан айбли деб топилиб, 10 йил 6 ойга озодликдан маҳрум қилинди. А.У. эса (II гуруҳ ногирони) шу моддалар билан айбли деб топилиб, 7 йил 6 ой муддатга озодликдан маҳрум этилди.
Қайд этилишича, биринчи инстансия судининг ҳукми устидан тарафлар қонунда белгиланган тартиб ва муддатда Тошкент вилоят суди апелляция ёки кассация инстансиясига шикоят бериш ва протест киритиш ҳуқуқига эга.
Мазкур воқеа 2025 йил апрель ойида ижтимоий тармоқларда Ангрен шаҳрида вояга етмаган қизга нисбатан зўравонлик содир этилгани ҳақида хабарлар тарқалгач жамоатчилик эътиборига тушганди. Ҳолат юзасидан 9 апрель куни Ангрен шаҳар ИИБ томонидан жиноят иши қўзғатилиб, тергов ҳаракатлари олиб борилган.
Болалар омбудсмани ва Ижтимоий ҳимоя миллий агентлиги мазкур ишни назоратга олган. Агентликнинг ҳудудий “Инсон” ижтимоий хизматлар маркази мутахассислари жабрланган қизни ҳимоя қилиш ва реабилитация қилиш бўйича комплекс чораларни кўрган.
Маълум қилинишича, жабрланган қизга зарур психологик, ижтимоий ва тиббий ёрдам кўрсатилган. У бронхопневмония ва анемия ташхиси билан шифохонада даволанаётгани билдирилган.
