Наманган вилояти Янгиқўрғон туманида тўйга келган 7 ёшли қариндош қизни зўрлаган эркакка ҳукм ўқилди. Бу ҳақда Олий суд хабар берди.
Бугун жиноят ишлари бўйича Янгиқўрғон туман судида Б.С.га (1987-йилда Наманган вилоятида туғилган, муқаддам судланиб, хавфли рецидивист деб топилган) оид жиноят ишини кўриб чиқиш бўйича суд жараёни якунланиб, суд ҳукми эълон қилинди.
Ушбу жиноят иши Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ ёпиқ суд мажлисида кўриб чиқилди. Эълон қилинган суд ҳукмига мувофиқ Б.С. вояга етмаган И.К. (қиз бола, 2018-йилда туғилган)га нисбатан Жиноят кодексининг 112-моддаси (ўлдириш ёки зўрлик ишлатиш билан қўрқитиш) 1-қисми, 118-моддаси (номусга тегиш) 4-қисми ва 119-моддаси (жинсий эҳтиёжни зўрлик ишлатиб ғайритабиий усулда қондириш) 4-қисмида назарда тутилган жиноятларни содир этганликда айбли деб топилиб, унга 18 йил муддатга озодликдан маҳрум қилиш жазоси тайинланди.
Шунингдек, Жиноят кодексининг 34-моддаси (рецидив жиноят) 3-қисми “а” бандига асосан Б.С. ўта хавфли рецидивист деб топилди. Тайинланган жазо муддатининг дастлабки 3 йилини қамоқда, жазонинг қолган муддатини махсус тартибли колонияларда ўташи белгиланди.
Биринчи инстансия судининг ҳукми устидан тарафлар қонунда белгиланган тартиб ва муддатда Наманган вилоят судининг апелляция/кассация инстанциясига шикоят бериш ва протест келтиришга ҳақлилиги маълум қилинди.
- Ўзбекистонда 2025-йилда қотиллик камайиб, номусга тегиш жинояти кўпайди
Ички ишлар вазири ўринбосари Рамазон Ашроповнинг сўзларига кўра, жорий йилда қотиллик камайган, бироқ номусга тегиш жинояти ошган.
“2024-йилда 339 та қотиллик қайд этилган бўлса, 2025-йилда бу кўрсаткич 288 тага тушган. ЙТҲ эса 9365 тадан 8738 тага камайган. Бироқ номусга тегиш жинояти ўтган йилга нисбатан 359 тадан 381 тага кўпайган”, деди Рамазон Ашропов.
Бундан ташқари, энди ИИБ ходимлари устидан қилинган ҳар қандай мурожаат фавқулодда ҳолат дея баҳоланади. 102 қисқа рақамига ИИБ ходими устидан қилинган ҳар бир мурожаатга туман ёки вилоятдаги раҳбарнинг шахсан ўзи жавоб беради.
