Сурхондарёда ит болаларини қулоқларини узиб ташлаган йигитга 10 сутка маъмурий қамоқ жазоси тайинланди. Бу ҳақда 22 февраль куни вилоят Экология ва иқлим ўзгариши бош бошқармаси хабар берди.
Унда келтирилишича, Шеробод туманида яшовчи фуқаро О.Й. ўзининг ижтимоий тармоқдаги саҳифасида итнинг 3 бош боласига нисбатан шафқатсиз муносабатда бўлиб, уларнинг қулоқ қисмларини қўл билан юлиб ташлагани акс этган видео материални жойлаштирган.
21 февраль куни ҳолат юзасидан Маъмурий жавобгарлик тўғрисидаги кодекснинг 111-моддаси 2-қисмига асосан маъмурий баённома расмийлаштирилиб, ҳужжатлар судга юборилганди. Ҳолат ҳуқуқбузар яшовчи маҳаллада ҳам муҳокама қилиниб, йиғилиш иштирокчиларига ҳайвонларга нисбатан зўравонлик ва шафқатсизлик қонунчиликка мувофиқ жазоланиши юзасидан тушунтириш ишлари олиб борилган.
“Мен жорий йилнинг 20 февралида ўзимга тегишли бўлган кучук болаларининг қулоқларини шафқатсизларча юлиб олдим ва видеосёмка қилиб Instagram’га жойладим. Бу қилган ишларимдан мингдан-минг афсусдаман. Халқимиздан узр сўрайман. Бошқаларга ҳам маслаҳат бермайман”, деган у суд мажлисида.
Ҳайвонларга шафқатсиз муносабатда бўлганлик учун жазо
Маъмурий жавобгарлик тўғрисидаги кодекснинг 111-моддасига кўра, ҳайвонларга нисбатан шафқатсиз муносабатда бўлиш, яъни уларни ғаразли ёки бошқа паст ниятларда қийноққа солиш ёки уларга азоб бериш, БҲМнинг 3 бараваридан 5 бараваригача (1 млн 236 минг сўмдан 2 млн 60 минг сўмгача) миқдорда жарима солишга сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса ёхуд ушбу модданинг биринчи қисмида назарда тутилган ҳуқуқбузарлик вояга етмаган шахс ҳозирлигида содир этилган бўлса ёки ҳайвонларнинг ўлимига ёхуд майиб бўлишига олиб келса, БҲМнинг 5 бараваридан 10 бараваригача (2 млн 60 минг сўмдан 4 млн 120 минг сўмгача) миқдорда жарима солишга ёки 15 суткагача маъмурий қамоққа олишга сабаб бўлади.
