Қирғизистон президенти Садир Жапаров Жиноят кодексига бир қатор оғир жиноятлар, жумладан, аёллар ва болаларга нисбатан зўравонлик ҳамда номусга тегиш ҳолатлари учун жазоларни кескин кучайтиришни назарда тутувчи тузатишлар киритди. Аниқроғи, эндиликда юқоридаги каби жиноятларда айбланган шахсларга умрбод қамоқ жазоси тайинланади. Бу ҳақда Кабар нашрига таяниб, Anadolu хабар берди.
Маълум қилинишича, янги қонун лойиҳасининг бош мақсади болалар ва аёлларнинг ҳаёти ҳамда соғлиғини жиноий тажовузлардан ҳимоя қилиш, уларнинг хавфсизлигини таъминлашдан иборат. Ҳужжатга кўра, кодекснинг 58-моддасига, 122-модданинг 2 ва 3-қисмларини қўллаш бўйича аниқлик киритилган.
Жазоларнинг кучайтирилиши
Ўзгартиришларга кўра, айрим турдаги оғир жиноятлар учун мол-мулкни мусодара қилган ҳолда умрбод озодликдан маҳрум қилиш жазоси белгиланди. Хусусан:
- 122-модда (қасддан одам ўлдириш) бўйича 2-қисмнинг 8-банди ўз кучини йўқотган деб топилди, бироқ тўлдирилган 3-қисмда жинсий эҳтиёжни зўравонлик билан қондириш каби ҳаракатлар учун умрбод қамоқ жазоси кўзда тутилди.
- 154-модданинг иккинчи қисмида ҳам эндиликда мол-мулкни мусодара қилиш билан бирга умрбод озодликдан маҳрум қилиш жазоси қўлланилади.
Президент томонидан имзоланган ушбу қонун расмий эълон қилинган кундан бошлаб 10 кун ўтгач, қонуний кучга киради.
