Қашқадарёда 5 ёшли қизни унинг онаси билан келишиб, сотиб юборган ҳамширага суд ҳукми ўқилди. Бу ҳақда “Миллий” телеканалида хабар қилинди.
Қайд этилишича, Косон туманида поликлиникада ишловчи 32 ёшли ҳамшира 2020-йилда туғилган қизни унинг онаси билан келишиб, бошқа бир аёлга 19 миллион 700 минг сўм эвазига пуллаган.
Ҳамширанинг режалари шу билан тугамай, у “харидори”га бола учун туғилганлик ҳақида гувоҳнома олиб беришини айтиб, 2 миллион сўм пул олган ва 60 ёшли эркак билан тил бириктириб, қизни бошқа бир фуқарога 15 минг доллар эвазига сотаётган вақтида қўлга тушган.
Ушбу жиноятларни содир этган аёл суд ҳукми билан 2 йил 6 ой муддатга озодликдан маҳрум қилинди ва БҲМнинг 30 баробари миқдорида жаримага тортилди. Унинг шеригига эса 3 йил муддатга озодликни чеклаш ва БҲМнинг 30 баробари миқдорида жарима белгиланди.
