Жиззах вилоятида ўзидан бир ёш катта қизни хорижий давлатга фоҳишалик қилишга юбормоқчи бўлган 18 ёшли қиз қўлга тушди. Бу ҳақда Ички ишлар вазирлиги хабар қилди.
Қайд этилишича, Ғаллаорол туманида яшовчи 2007 йилда туғилган қиз Шароф Рашидов туманида истиқомат қилувчи 19 ёшли фуқарони Таиланднинг Бангкок шаҳрида фоҳишалик билан шуғулланиш орқали кунига 350—400 доллар даромад топишига ишонтириб, сафар харажатларини ўз зиммасига олган.
Шундан сўнг улар 12 январь санасига Тошкент—Бангкок йўналиши бўйича авиачипталар харид қилиб, Тошкент халқаро аэропортига йўл олган. Бироқ фуқаролар Дўстлик туманидаги Манас-14 ЙПХ масканида тўхтатилиб, процессуал тартибда ушланди.
Мазкур жараёнда улардан мобил телефон аппарати, хорижга чиқиш паспорти ва авиачипталар далилий ашё сифатида олинди.
Ҳолат юзасидан Жиноят кодексининг одам савдосини назарда тутувчи моддаси билан иш очиш чоралари кўрилаётгани маълум қилинди.
