2025 йилда Ўзбекистонда ҳуқуқ-тартибот идоралари томонидан 15 мингдан зиёд наркожиноят фош этилди. Бу ҳақда Президент Шавкат Мирзиёев бугун, 20 апрель куни “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги халқаро форум иштирокчиларига йўллаган мурожаатида айтилади.
Табрик хатида айтилишича, бугун наркотиклар савдоси трансчегаравий ва виртуал характерга эга бўлиб бораётгани хавф-хатарларни янада кучайтирмоқда. Айниқса, жиноий гуруҳларнинг шифрланган алоқа каналлари, контактсиз мулоқот ва мураккаб молиявий воситалардан фойдаланаётгани наркотикларга қарши курашишда биздан замонавий ечим ва ёндашувларни талаб қилмоқда.
More stories“Бугун аҳоли, айниқса, ёшлар орасида янги синтетик наркотиклар, психотроп ва кучли таъсир қилувчи моддалар кенг тарқалаётгани ҳам барчамизни чуқур ташвишга солиши табиий”, дейилади Президент хабарида.
Бирлашган Миллатлар Ташкилотининг маълумотига кўра, дунёда 300 миллиондан ортиқ одам гиёҳванд моддалар таъсирига тушиб қолган. Ҳар йили 600 мингга яқин инсон ушбу иллатнинг қурбонига айланмоқда.
Қайд этилишича, бугунги глобаллашув шароитида бундай хавф-хатар барча давлатлар қаторида Ўзбекистонни ҳам четлаб ўтаётгани йўқ. Шу боис, Ўзбекистонда гиёҳвандлик ва наркожиноятларга қарши курашиш масаласини умуммиллий ҳаракатга айлантириб, барча куч ва воситаларни сафарбар қиляпти.
Сўнгги йилларда соҳада идоралараро ҳамкорликни мустаҳкамлаш, профилактика механизмларини ривожлантиришга қаратилган 20 дан ортиқ қонун ҳужжатлари қабул қилинган. Айниқса, 2024 йилда наркотикларга қарши курашиш бўйича миллий стратегия қабул қилингани бу борадаги энг катта қадам бўлган.
Бундай саъй-ҳаракатлар ҳисобига сўнгги йилларда наркотикларнинг ноқонуний айланмаси билан боғлиқ жиноятларни аниқлаш кўрсаткичи 2,5 баробар ошган, мусодара қилинган гиёҳвандлик воситалари 2 баробар, йўқ қилинган синтетик наркотиклар 7 баробар кўпайган.
“Биргина ўтган йилнинг ўзида ҳуқуқ-тартибот идоралари томонидан 15 мингдан зиёд наркожиноят фош этилди, қарийб 3,5 тонна гиёҳвандлик воситалари, жумладан, 120 килограмм синтетик наркотиклар йўқ қилинди, 14 та яширин нарколаборатория ва 72 та йирик интернет дўкони фаолиятига чек қўйилди”, дейилади хабарда.
Қўшимча қилинишича, бундай жиноятларнинг учдан бири ёшлар томонидан содир этилмоқда. Асосий хавф гуруҳини 15 ёшдан 30 ёшгача бўлганлар ташкил қилмоқда.
