Финландиянинг Коувола шаҳри яқинига 29 март куни иккита номаълум дрон қулаб тушгани аниқланди. Мамлакат Мудофаа вазирлиги ушбу ҳодисани ҳудудий дахлсизликнинг бузилиши сифатида баҳолади. Бу ҳақда Euronews хабар берди.
Финландия Бош вазири Петтери Орпо мамлакатнинг давлат телерадиокомпаниясига берган интервьюсида, мазкур аппаратлар йўлидан адашган Украина дронлари бўлиши мумкинлигини истисно қилмади.
“Дронларнинг Финландия ҳудудига кириб келиши жиддий ҳолат ва биз буни диққат билан ўрганяпмиз. Катта эҳтимол билан булар Украинага тегишли дронлардир, бироқ якуний хулоса тергов ишлари якунлангач эълон қилинади”, деди Петтери Орпо.
Бош вазирнинг қайд этишича, сўнгги вақтларда Украина Финландия билан 1340 километрлик чегарага эга бўлган Россия ҳудудларига ҳужумлар уюштирмоқда. Унинг фикрича, Кремль томонидан қўлланилаётган сигналларни бўғувчи (РЕБ) воситалар Украина дронларининг йўналишидан адашиб, Финландия ҳаво ҳудудига кириб қолишига сабаб бўлган бўлиши мумкин.
Финландия Мудофаа вазири Антти Ҳакканен вазият назоратга олинганини ва воқеа жойига хавфсизлик кучлари юборилганини маълум қилди. Вазирлик хабарига кўра, 29 март куни эрталаб Финландия жануби-шарқидаги денгиз ҳудуди ва қуруқлик устида паст баландликда учаётган бир нечта секин ҳаракатланувчи объектлар аниқланган.
Мазкур объектларни идентификация қилиш мақсадида ҳарбий-ҳаво кучларининг F/А-18 Hornet қирувчи самолёти ҳавога кўтарилган. Ҳозирда полиция дронлар қулаган ҳудудларни ўраб олган ва текширув ишларини олиб бормоқда.
