Қашқадарё вилояти Миришкор туман тиббиёт бирлашмаси шифокори бемор аёлга шилқимлик қилгани учун 5 суткага қамалди.
Суд ҳужжатларида маълум бўлишича, 2026 йил 14 январь куни соат 22:30 ларда кечки навбатчиликда турган Миришкор туман тиббиёт бирлашмаси шифокори Р.У. даволаниш учун ётқизилган бемор А.С.нинг даволовчи шифокори бўлмаса-да, текшириш мақсадида муолажа хонасига чақирган. Аёл муолажа хонага борганида, Р.У. спирт билан муолажа қилиш баҳонасида унга тегиниб, шилқимлик қилган.
Судда айбланувчи эртаси куни ишда бўлмаслигини ўйлаб, беморни қаровдан ўтказмоқчи бўлганлигини, қилган ишидан пушаймонлигини билдириб, жабрланувчидан кечирим сўраган.
Аёл эса ўз кўрсатувида Р.У.ни танимаслигини, у ўзини шифокор деб таништириб, тиббий текширув баҳонасида алоҳида хонага чақирганини, жавобгарликдан қочиш учун ёлғон гапираётганини таъкидлаб, унга нисбатан қатъий чора кўришни сўраган.
Жиноят ишлари бўйича Миришкор туман суди Р.У.ни Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик қилиш) билан айбли деб топиб, унга нисбатан 5 сутка маъмурий қамоқ жазоси тайинлади.
