Миннесота ва Иллинойс штатлари 12 январь куни АҚШ президенти Дональд Трамп администрациясига қарши даъво очди. Штатлар ҳудудида иммиграция қонунчилигини ижро этувчи федерал зобитлар сонининг кескин оширилишини тўхтатишни талаб қилмоқда. Бу ҳақда Reuters хабар берди.
Вазият ўтган ҳафтада Миннесотада ICE (Иммиграция ва божхона назорати) ходими томонидан бир аёлнинг отиб ўлдирилиши ортидан кескинлашган.
Ирқий камситиш ва сиёсий тазйиқ
Миннесота бош прокурори Кит Эллисон томонидан берилган даъво аризасида АҚШ Миллий хавфсизлик котиби Кристи Ноэм ва бир қатор иммиграция мулозимлари жавобгар сифатида кўрсатилган. Штат федерал суддан ушбу “кучлар оқими”ни конституцияга зид ва ноқонуний деб топишни сўрамоқда.
Миннесота расмийлари республикачилар администрациясини фуқароларни ирқий белгилари бўйича таъқиб қилишда ва штат демократларга мойил бўлгани учун уни нишонга олишда айблади.
“Миннесотага минглаб қуролланган ва ниқобли агентларнинг юборилиши штатимизга жиддий зарар етказди. Бу моҳиятига кўра эгизак шаҳарлар (Миннеаполис ва Сент-Пол) ҳамда Миннесота штатига қилинган федерал босқиндир ва у тўхтатилиши керак”, деди Эллисон матбуот анжуманида.
Иллинойс губернатори Жек Притскер ҳам департаментнинг “куч ишлатишдаги хавфли усуллари”га қарши шунга ўхшаш даъво киритди. Даъвода кўздан ёш оқизувчи газ ишлатиш, шахсий мулкка рухсатсиз кириш ва махфий операциялар учун автомобиль рақамларини яшириш каби тактикаларни тақиқлаш сўралган.
“Коррупциялашган сиёсатчиларни жиловлаймиз”
АҚШ Миллий хавфсизлик вазирлиги раҳбари Кристи Ноэм эса Миннесотани “бошпана штат” деб атаб, маҳаллий сиёсатчиларни жамоат хавфсизлигидан кўра сиёсатни устун қўйишда айблади.
“Йиллар давомида бу коррупциялашган фаол сиёсатчилар миннесоталикларни ҳимоя қилишдан бош тортиб келди. Биз бу кенг тарқалган фирибгарликнинг илдизини қирқамиз, америкаликларга зарар етказаётган ноқонуний жиноятчиларни ҳибсга оламиз ва бу жиноийларга ёрдам бераётганларни жавобгарликка тортамиз”, деб ёзди Ноэм X тармоғида.
