АҚШ раҳбари Дональд Трамп Венесуэлада президентлик сайловларини ўтказиш ҳақида гапиришдан олдин мамлакатда қонун устуворлиги ва иқтисодий тартиб тикланиши кераклигини айтди. Бу ҳақда New York Post хабар берди.
Трамп шу тариқа мухолифат етакчиси ва тинчлик бўйича Нобель мукофоти совриндори Мария Корина Мачадони қўллаб-қувватлаш масаласини четлаб ўтди. У ҳозирда ҳеч ким мамлакатни бошқариш учун зарур бўлган қўллаб-қувватловга эга эмаслигини таъкидлади.
“Менимча, у одамларнинг етарли даражада қўллаб-қувватлашига эга эмас”, деди Трамп.
Шунингдек, у Венесуэладаги вазият АҚШни Ироқ ва Афғонистондаги каби узоқ давом этадиган можарога тортиб кетишидан хавотирда эмаслигини билдирди. Агар Мачадо сайловда ғалаба қозонса, уни қўллаб-қувватлайсизми, деган саволга Трамп аниқ жавоб бермади. У Венесуэланинг ҳозирги вазияти фонида сайловлар иккинчи даражали масала эканини айтди.
“Мамлакатни қонун ва тартиб билан бошқариш керак. Биз шундай бошқаришимиз керакки, уларнинг иқтисодий бойликларидан — қимматбаҳо нефть ва бошқа ресурслардан фойдалана олайлик”, деди Трамп ва Мачадо ҳақида қуйидагича деди:
“У фақат мен уни қўллаб-қувватлаган тақдирдагина сайловда ютиши мумкин. Лекин мен уни жуда ёқтираман”.
Президентнинг таъкидлашича, Венесуэла иқтисодиёти “социалистларнинг ўнлаб йиллар давомидаги талон-торож қилгани ва нотўғри бошқаруви” оқибатида ҳалокат ёқасига келиб қолган.
“Венесуэла амалда учинчи дунё мамлакатига айланиб, ҳалокатга юз тутишга тайёр”, деди у.
Трампнинг фикрича, сайловларни шошилинч ўтказиш ўрнига, энг аввало мамлакатни барқарорлаштириш керак. Чунки сиёсатчи бу АҚШ ва Венесуэла учун бирдек манфаатли бўлишини айтди. У, шунингдек, АҚШ ҳарбий операциясини “аниқ ва эҳтиёткорлик билан бажарилган” деб баҳолаб, уни намунали миссия деб таърифлади.
“Бу катта ғалаба бўлди. Биз вазифани аъло даражада бажардик. Ҳеч ким ҳалок бўлмади, бир-икки аскар яраланди. Бирорта вертолёт, реактив самолёт ёки бошқа учоқни йўқотмадик. Биз тўлиқ ва мутлақ ғалаба қозондик — айнан шундай бўлиши керак эди”, деди у.
Трамп бундай операцияларнинг хавфлилиги ва катта таваккалчилигини таъкидлаб, миссияни “тўлиқ ва мутлақ ғалаба” деб эълон қилди.
“Биласизми, бундай операцияларга киришганда 50 киши ҳалок бўладими йўқми, билмайсиз. Аммо биз ҳеч кимни йўқотмадик. Баъзи аскарлар, жумладан, вертолёт учувчилари яраланди, бир-иккитаси ўққа тутилди. Улар шундай бўлса ҳам вертолётни учираверишди”, дея таъкидлади Трамп.
У бу операцияни ўзининг олдинги президентлик давридаги муҳим қарорлар билан солиштирди. Жумладан, ИШИД етакчиси Абу Бакр ал-Бағдодий ва эронлик генерал Қосим Сулаймонийнинг йўқ қилинганини, шунингдек, июнь ойида Эрон ядровий дастурининг барбод этилганини эслатди. АҚШ президенти Венесуэланинг сиёсий келажаги ҳақида гапирар экан, бу масала мамлакат барқарорлашгандан кейингина кўриб чиқилишини айтди.
“Балки, Мачадо сайловда қатнашиши керакдир. Балки, бошқа биров иштирок этар. Лекин аввало мамлакатни тўғри бошқаришимиз керак”, дея хулоса қилди Трамп.
