Ўзбекистон Жаҳон савдо ташкилотига аъзо бўлиш учун фақат битта давлат билан икки томонлама музокарани якунлаши қолди. Бу ҳақда президентнинг ЖСТ бўйича вакили Азизбек Ўрунов LinkedIn’да ёзиб қолдирди.
Ўрунов 2025-йилни сарҳисоб қилар экан, ўтган йилни республиканинг ЖСТга аъзо бўлиши доирасида “ҳал қилувчи ва натижага йўналтирилган” деб атади.
Йил якунларига кўра, Ўзбекистон ЖСТга аъзо 34 давлатдан 33 таси билан бозорга кириш бўйича икки томонлама музокараларни якунлади. 40 дан ортиқ музокара раундлари ҳамда ишчи гуруҳнинг 2 та йиғилиши ўтказилиб, 200 дан ортиқ ёзма саволларга жавоблар берилди. Европа Иттифоқи, Хитой, Россия, Буюк Британия, Швейцария, Канада, Австралия ва бошқа йирик савдо ҳамкорлари билан келишувларга эришилди.
“Фақат битта икки томонлама музокара якунланиши кутилмоқда”, деди у Тайванни назарда тутиб.
Ўтган йил давомида Ўзбекистон ЖСТ билан боғлиқ 30 та ҳуқуқий ҳужжат қабул қилди: 4 та қонун, 8 та президент фармони ва қарори, 12 та Вазирлар Маҳкамаси қарори ва 6 та идоравий меъёрий ҳужжатлар. Қўшимча равишда 29 та ҳуқуқий ҳужжат лойиҳаси тайёрланди. Божхона тартиботлари, экспорт божлари, савдони ҳимоя қилиш чоралари, интеллектуал мулк ҳуқуқларини ҳимоя қилиш, техник тартибга солиш, санитария ва фитосанитария ҳамда савдодаги техник тўсиқлар (СПС ва ТБТ) соҳаларида комплекс ислоҳотлар амалга оширилди.Азизбек Ўруновнинг қайд этишича, товарлар ва хизматлар бозорига кириш бўйича якуний консолидация қилиш босқичига ўтилди. Экспорт божлари, транзит эркинлиги ва савдо тартиботларини соддалаштириш бўйича ишлар сўнгги босқичга етди. ЖСТнинг соҳавий битимлари доирасида фаол ишланди. 2026 йил учун қуйидаги устувор вазифалар турибди:
- қолган битта икки томонлама музокарани якунлаш;
- кўп томонлама музокаралар ва ишчи гуруҳ ҳисоботини тугатиш;
- қонунчиликни тўлиқ мувофиқлаштириш;
- Ўзбекистоннинг ЖСТга аъзо бўлиш жараёнини якунига етказиш.
Президент Шавкат Мирзиёев Ўзбекистоннинг ушбу ташкилотга аъзо бўлиши чуқур ўйланган ва узоқни кўзлаган танлов эканлигини таъкидлаганди.
