Жиззахда ноқонуний ер сотиш билан боғлиқ жиноий ҳолат фош этилди. Бу ҳақда Ички ишлар вазирлиги хабар қилди.
Қайд этилишича, Бахмал тумани Сангзор маҳалла фуқаролар йиғинида яшовчи 1975-йилда туғилган фуқаро ўзи яшаётган қишлоқ ҳудудида жойлашган, ҳеч қандай ҳуқуқий ҳужжатларга эга бўлмаган, Бахмал туман ҳокимлиги захирасида турган икки гектар ерни пулламоқчи бўлган.
У майдонни кейинчалик юқори лавозимларда ишловчи танишлари орқали деҳқон хўжалиги юритиш учун ажратиб беришни ваъда қилган.
Фуқаро ерни 50 минг долларга сотиш бўйича келишувга киришиб, олдиндан келишилган маблағдан 400 миллион сўмни Ғаллаорол тумани ҳудудида олган вақтда ашёвий далиллар билан қўлга олинган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
