UFC яримўрта вазн тоифасининг амалдаги чемпиони, 34 ёшли россиялик Ислом Махачев навбатдаги жангини ушбу вазн тоифасида мағлубияциз серия қайд этаётган ва рейтингда иккинчи ўринни эгаллаб турган қозоғистонлик Шавкат Раҳмоновга қарши ўтказиш эҳтимолини инкор этмади.
“Шавкат? Унда узоқ танаффус бўлди. Бу масалани мен ҳал қилмайман. Агар у тайёр бўлса, нега энди йўқ? Эшитишимча, танаффусдан кейин унга жанг берилиши керак”, дея Махачевнинг сўзларини келтиради Матч TV.
Айни пайтда Ислом Махачев UFC’да кетма-кет 16 та ғалаба қайд этган. Умуман олганда, унинг ҳисобида 28 та ғалаба ва 1 та мағлубият бор. Россиялик жангчи сўнгги жангини Нью Йоркда бўлиб ўтган UFC 322 турнирида австралиялик Жек Делла Маддаленага қарши ўтказди. Яримўрта вазн чемпионлик камари учун кечган баҳсда ҳакамларнинг бир овоздан чиқарган қарори билан Махачев ғалаба қозонган.
Маълумот учун, Шавкат Раҳмонов профессионал фаолияти давомида 19 та жанг ўтказган ва уларнинг барчасида ғалаба қозонган. У 2020-йилдан буён UFC доирасида 7 марта октагонга чиқиб, барча жангларда рақибларини мағлуб этган. Спортчи охирги жангини 2024-йилнинг 7 декабрь санасида Иан Мачадо Гаррига қарши ўтказиб, ғалаба қозонган эди.
