Янги Тошкентда барпо этилган мусиқий фаввора иккита Гиннес рекордини ўрнатди. Бу ҳақда Вазирлар Маҳкамаси ҳузуридаги Янги Тошкент шаҳрини қуриш дирексияси хабар берди.
Гиннес рекордлари ташкилоти расмий ҳаками Мегги Луо ушбу натижаларни тасдиқловчи сертификатларни топширди.
Янги Тошкентдаги баландлиги 232,69 метрлик мусиқий фаввора очиқ осмон остидаги мусиқий фавворалар орасида дунёдаги энг баланди деб тан олинди. Аввалги рекорд — 204,7 метр бўлиб, ушбу натижа Хитойнинг Сзянсу провинциясидаги фавворага тегишли эди.
Яна бир жаҳон рекорди юзи 2617,23 квадрат метр бўлган айлана сув экранидаги энг йирик проексия учун берилди. Бунгача мазкур турдаги энг йирик проексия 2400 квадрат метрни ташкил этган эди.
