Ўзбекистонда 3 миллиондан ортиқ обуначига эга олти нафар топ блогер 2025 йил давомида жами 2,7 миллиард сўм даромад топиб, бюджетга 110,4 миллион сўм солиқ тўлади. Бу ҳақда Солиқ қўмитасида блогерлар билан ўтказилган учрашувда айтилди.
Маълум қилинишича, блогерлар фаолиятини ўрганиш доирасида мазкур соҳанинг энг фаол 110 нафар вакиллари рўйхати шакллантирилган. Таҳлил натижаларига кўра, улардан 55 нафари ўзини ўзи банд қилган шахс сифатида, 33 нафари якка тартибдаги тадбиркор сифатида рўйхатдан ўтган, қолган 22 нафари эса жисмоний шахс мақомида фаолият юритмоқда.
Шунингдек, 3 миллиондан ортиқ обуначига эга 6 нафар топ-блогер фаолияти алоҳида ўрганилган. Аниқланишича, 2025 йил давомида улар томонидан 360 та Instagram ҳикоя (ўртача ойига 5 та) ва 184 та реклама постлари жойлаштирилган.
Электрон ҳисобварақ-фактуралар орқали тақдим этилган расмий ҳисоботларга кўра, мазкур блогерларнинг жами даромади 2,7 млрд сўмни ташкил этган бўлиб, бюджетга 110,4 млн сўм солиқ тўланган.
Учрашув давомида блогерлар жамоаси вакилларига реклама жойлаштиришдан олинадиган даромадларни солиққа тортиш бўйича қонунчилик нормалари тушунтирилган. Хусусан, ўзини ўзи банд қилган шахс мақоми ходим ёллаш ҳуқуқини бермаслиги, амалда эса айрим блогерлар томонидан администраторлар, ёрдамчилар ва бошқа мутахассислар жалб қилинаётгани қайд этилган.
Солиқ қўмитасида блогерлар фаолиятини солиқ қонунчилиги талабларига мувофиқлаштириш ва даромадлар шаффофлигини таъминлаш муҳим экани алоҳида таъкидланган.
