Венесуэлада мухолифат етакчиси Мария Корина Мачадо Оқ уйда ўтказилган қабул маросими чоғида АҚШ Президенти Дональд Трампга ўзининг Тинчлик бўйича Нобель мукофотини топширди. Бу ҳақда Мачадо кеча, 15 январь куни матбуот ходимлари билан қилган суҳбатида айтиб ўтди.
“Мен Президент Трампга шуни айтдимки, 200 йил аввал генерал Лафайет Жорж Вашингтон тасвири туширилган медални Симон Боливарга топширган эди. Ўшандан буён Боливар у медални қўлидан қўймаган. Орадан 200 йил ўтиб, Боливар халқи Вашингтон меросхўри бўлган АҚШ Президентига эркинлигимиз эътирофи сифатида Нобель Тинчлик мукофотини топширди”, деган Мачадо.
Сиёсатчининг фикрича, Трамп Венесуэладаги сиёсий маҳбуслар ва барча венесуэлаликларнинг эркинлигига тўлиқ содиқ.
Норвегия Нобель қўмитаси баёнотига кўра, мукофотни қайтариб олиш ёки бошқа шахсга расмий равишда топшириш мумкин эмас.
Январь ойи бошида Мачадо 2025 йилнинг октябрида Венесуэлада демократияни илгари суриш йўлидаги саъй-ҳаракатлари учун ўзига берилган Нобель мукофотини Трампга топширишга тайёр эканини маълум қилган эди. Сиёсатчи мукофот Венесуэла халқига тегишли эканини айтиб, АҚШ билан хавфсизлик, энергетика ва сармояларни ҳимоя қилиш соҳаларида ҳамкорлик қилишга тайёрлигини билдирган.
Трамп эса Мачадо ҳақида танқидий фикр билдириб, уни “шунчаки ёқимтой аёл” деб атаган ва унда етакчилик қобилияти йўқлигини айтган.
Маълумот учун, Жильбер Лафайет – француз ҳарбий қўмондони ва зодагон бўлиб, АҚШ Мустақиллик урушида муҳим роль ўйнаган ҳамда Буюк Британияга қарши курашда америкалик мустамлакачиларни қўллаб-қувватлаган.
Симон Боливар – Венесуэланинг миллий қаҳрамони, Жанубий Американинг инқилобчиси ва давлат арбоби бўлиб, Венесуэла, Колумбия, Эквадор, Перу ва Боливия каби қатор Лотин Америкаси давлатларининг Испания ҳукмронлигидан мустақилликка эришиш ҳаракатларига бошчилик қилган.
