Европа комиссияси Финляндия бюджетининг ҳаддан ташқари тақчиллиги туфайли унга нисбатан жарима чораларини қўллашни тавсия қилди. Бу ҳақда Deutsche Welle хабар берди.
Европа Иттифоқи қоидаларига кўра, бюджет дефицитининг максимал рухсат этилган миқдори ялпи ички маҳсулотнинг 3 фоизини ташкил этади. Финляндияда бу кўрсаткич 2025-йилда 4,5 фоиз, 2026-йилда 4 фоиз, 2027-йилда 3,9 фоиз даражасида прогноз қилинмоқда. Агар бюджет тақчиллигининг ўсиши мудофаа харажатлари билан боғлиқ бўлса, Еврокомиссия истисно қилиши мумкин.
“Бироқ, Финляндия мисолида қарзларни фақат мудофаа харажатлари билан изоҳлаб бўлмайди”, дея таъкидланади комиссия баёнотида.
Финляндияга қарши жарима тартиби Европа Иттифоқи молия вазирлари томонидан 20 январь куни бўлиб ўтадиган йиғилишда тасдиқланиши керак. Назарий жиҳатдан кўп миллиардлик жарима қўлланилиши мумкин, аммо амалиётда бундай чора ҳеч қачон қўлланилмаган.
Финляндия бош вазири: Дефицит Украинадаги уруш туфайли юзага келган
“Европа Иттифоқининг дефицитни камайтириш бўйича процедураси кутилган эди. Ҳатто 10 миллиардлик бюджет тузатиши ҳам иқтисодиётимизга асосан Россиянинг тажовузкор уруши келтирган зарарни қопламайди. Ҳукуматнинг ҳаракатлари тўғри бўлган ва иш давом этиши керак”, деб ёзди Финляндия бош вазири Петтери Орпо X ижтимоий тармоғида.
Финляндия вице-премери ва молия вазири Риикка Пурра эса шундай деди:
“Еврокомиссия баҳоси кутилмаган ҳолат бўлмади, чунки мамлакат давлат молияси ҳолати ёмонлашишда давом этмоқда. Декабрь ойида Европа Иттифоқи биздан вазиятни қанчалик ттез ўнглашимизни кутаётганини билиб оламиз. Чоралар бизга боғлиқ бўлади”.
Финляндия ҳукумати энди Европа Иттифоқи 20 январда қандай тавсиялар беришини кутмоқда, улар уч ой ичида кўрилган чоралар тўғрисида ҳисобот беришга тайёр. Хелсинки худди шундай тартиб Бельгия, Италия, Австрия, Малта, Польша, Франция, Руминия, Словакия ва Венгрия каби давлатларга нисбатан қўлланилганини эслатиб ўтди.
