Бугун, 2 июль куни Покистоннинг бир қатор ҳудудларида кузатилган кучли ёмғир ва тошқинлар оқибатида камида 14 киши ҳалок бўлди, ўнлаб одамлар жароҳатланди. Бу ҳақда “The Nation” хабар берди.
Энг кўп талафот Сват туманида қайд этилган. Сайфуллоҳ кўлида қайиқ ағдарилиб кетиши оқибатида бир оилага мансуб олти нафар сайёҳ ҳалок бўлган. Қутқарувчилар уларнинг жасадларини топган, яна бир аёлни қидириш ишлари давом этаётгани қайд этилган.
Атток туманида кучли ёмғир оқибатида девор ва томларнинг қулаши сабаб уч киши ҳалок бўлган. Ланди Котал ҳудудида эса чақмоқ уриши туфайли икки нафар бола ҳаётдан кўз юмган, яна тўрт киши жароҳат олган. Юқори Дир туманидаги мадрасада чақмоқ уриши оқибатида 20 нафар ўқувчи жароҳатланган.
Жоб ҳудудида уй томининг қулаши оқибатида бир аёл ва бир бола ҳалок бўлган. Абботободда ёмғир суви автомобилни оқизиб кетиши оқибатида уч киши жароҳатланган. Мардон шаҳрида эса бўрон вақтида девор ва реклама пештоқининг қулаши сабаб икки нафар бола ва яна бир киши тан жароҳати олган. Шунингдек, бир киши чақмоқ уриши натижасида вафот этган.
Кучли ёғингарчилик Исломобод ва Равалпиндида ҳаво ҳароратини пасайтирган бўлса-да, Лаҳорда электр узатиш тармоқларидаги носозликлар туфайли электр таъминотида узилишлар юз берган. Ҳарипур, Абботобод ва Гужрат каби ҳудудларда йўллар, бозорлар ҳамда пастқам жойларни сув босган.
Покистоннинг Табиий офатларни бошқариш миллий бошқармаси Гилгит-Балтистон, Хайбар Пахтунхва ва Озод Кашмир ҳудудларида музлик кўлларининг ёрилиши оқибатида сув тошқинлари юз бериши мумкинлигидан огоҳлантирган. Шунингдек, тоғли ҳудудлардаги сой ва жилғаларда сув сатҳи кескин кўтарилиши эҳтимоли қайд этилган.
