SpaceX компаниясининг Starlink лойиҳасига тегишли сунъий йўлдошлардан бирида орбитада носозлик юз берди. Ҳодиса оқибатида сунъий йўлдош билан алоқа узилди ва космосда қолдиқ бўлаклари пайдо бўлди. Бу ҳақда “Straits times” хабар берди.
Маълум қилинишича, аномалия тахминан 418 километр баландликда содир бўлган. SpaceX маълумотига кўра, ҳодиса оқибатида кичик миқдорда қолдиқлар ҳосил бўлган. Сунъий йўлдош тез орада орбитасини йўқотиб, Ер атмосферасига қайта киради ва бир неча ҳафта ичида бутунлай парчаланиб кетади.
Компания баёнотида айтилишича, мазкур сунъий йўлдош Starlink’нинг кенг полосали интернет хизматини таъминлайдиган қарийб 10 мингта аппаратдан бири бўлган. Ҳодисадан сўнг у тахминан тўрт километрга кескин пасайган, бу эса бортда ички носозлик ёки кичик портлаш содир бўлганидан дарак беради.
Космик кузатув билан шуғулланувчи LeoLabs компанияси ҳодиса ортидан “ўнлаб” майда бўлаклар аниқланганини маълум қилди. Мутахассисларнинг фикрича, баландликнинг тез пасайиши ҳодисанинг бошқа космик объект билан тўқнашув эмас, балки ички техник муаммо туфайли юз берган бўлиши мумкин.
SpaceX қолдиқларни АҚШ Космик кучлари ва NASA билан ҳамкорликда кузатаётганини билдирди. Ҳозирча ушбу бўлаклар орбитадаги бошқа фаол сунъий йўлдошлар учун қанчалик хавф туғдириши борасида расмий изоҳ берилмади.
Шу билан бирга, мутахассислар ҳодисани йирик орбитал фалокатлар билан солиштирганда нисбатан кичик деб баҳоламоқда. Масалан, аввалроқ Intelsat сунъий йўлдоши парчаланиши оқибатида 700 дан ортиқ бўлаклар ҳосил бўлган, шунингдек, Хитой ракета қолдиқларининг парчаланиши ҳам катта хавф туғдирган эди.
Маълумот ўрнида, ўтган ҳафта Starlink’нинг муҳандислик бўйича вице-президенти Майкл Николс Х ижтимоий тармоғида Хитойга тегишли космик кема Starlink сунъий йўлдошидан атиги 200 метр масофада яқинлашганини маълум қилган эди. Унинг сўзларига кўра, космосдаги асосий хавфлардан бири сунъий йўлдош операторлари ўртасида етарли мувофиқлаштиришнинг йўқлигидир.
