Кеча, 5 ноябрь куни Чемпионлар лигаси доирасида “Брюгге” – “Барселона” ўйинига кетаётган испаниялик мухлислар автобуси ёниб кетгани сабабли йўловчилар эвакуация қилинди. Ҳодиса ўйиндан бир неча соат олдин содир бўлган. Бу ҳақда “Daily Express” нашри хабар берди.
Мухлисларнинг бир қисми “Ян Брейдел” стадионига йўл олаётганда автобусдан тутун ва олов чиққанини сезган. Автобус Брюгге шаҳридан унчалик узоқ бўлмаган катта йўлда ҳаракатланаётганда тўхташга мажбур бўлган. Ижтимоий тармоқларда тарқалган кадрларда ёнғин автобуснинг орқа қисмини қамраб олгани ва йўл четида кутиб турган мухлисларнинг хавфсиз тарзда эвакуация қилинаётганини кўриш мумкин.
Манбага кўра, воқеа натижасида ҳеч ким жабрланмаган. Белгиянинг HLN нашри хабар беришича, ҳодисага алоқадор бир эркак полиция томонидан ҳибсга олинган.
