Тошкент шаҳри Шайхонтоҳур туманида жойлашган гипермаркетлардан бирида ишловчи аёлга шилқимлик қилган эркак 10 суткага қамалди.
Судда маълум бўлишича, 2025-йилнинг 14 декабрь куни соат 20:20 атрофида И.А. туманда жойлашган савдо мажмуасида ишловчи М.X.га нисбатан шаҳвоний хусусиятга эга бўлган ҳаракатлар қилган. Хусусан, у жабрланувчининг бел қисмини қўли билан ушлаб, ўтиб кетган.
Мазкур ҳолат юзасидан ички ишлар органлари томонидан олиб борилган чора-тадбирлар давомида ҳуқуқбузар Шайхонтоҳур туман ИИБ биносига олиб келинган. Бироқ И.А. ходимларнинг қонуний талабларини бажармасдан, бақир-чақир қилиб, қўпол муносабатда бўлган.
Суд мажлисида И.А. айбини қисман тан олиб, пушаймонлигини билдирди.
Суд ҳукми билан эркак Маъмурий жавобгарлик тўғрисидаги кодексининг 41-1-моддаси 1-қисми (шаҳвоний шилқимлик қилиш), 183-моддаси (майда безорилик) ва 194-моддаси 1-қисми (ИИО ходимларининг қонуний талабларини бажармаслик) билан айбдор деб топилди. Унга нисбатан, 10 сутка маъмурий қамоқ ҳамда БҲМнинг 5 баравари, яъни 2 060 000 сўм миқдорида жарима жазоси тайинланди.
Эслатиб ўтамиз, 2022-йилда БМТнинг Ўзбекистондаги Тараққиёт дастури ҳамда “Немолчи” (Сукут сақлама) зўравонликка қарши лойиҳаси ҳамкорликда пойтахтда “Умидани чақиринг” ташаббусини илгари сурганди. Уни Korzinka.уз супермаркетлар тармоқлари, Асклепий Group дорихоналари, Caravan Group, YaponaMama, Testo by Zamira & Co., Steam Bar, Turka Saray kafe va restoranlari, TEAMS University каби ташкилотлар қўллаб-қувватлаганди.
Зўравонлик, шилқимлик ва бошқа тазйиқларга учраган аёллар яқин атрофдаги юқоридаги объектларга кирган ҳолда, қоровул ёки ходимларга “Умидани чақиринг” калит сўзини айтиш орқали ҳимояга эга бўлишлари, зарур ҳолларда ички ишлар ходимлари ёки тез тиббий ёрдамни чақириб бериш кўмаги кўрсатилади.
