Тошкентда ўтказилган тезкор тадбирда Telegram мессенжери орқали ноқонуний гиёҳвандлик воситалари, уларнинг аналоглари ва психотроп моддалар савдоси учун яратилган махсус бот фош қилинди. Бу ҳақда пойтахт Ички ишлар бош бошқармаси хабар берди.
Маълум қилинишича, мазкур бот орқали крипто-активларни олиш, ўтказиш ҳамда айирбошлаш билан шуғулланган шахслар ҳам аниқланган.
Пойтахтнинг Юнусобод туманида ўтказилган тезкор-қидирув тадбирлари натижасида 1997, 2001 йилда туғилган шахслар қўлга олинган. Улар томонидан ушбу бот бошқариб келингани аниқланган.
Тезкор тадбир давомида 4 дона телефон, 3 дона ноутбук, 12 дона турли хил банк пластик карталари, 11 дона SIM-карта, шунингдек, қоғозга ўралган гиёҳвандлик моддалари топилиб, холислар иштирокида расмийлаштириб олинган.
Шу билан бирга, гумонланувчиларнинг телефонлари кўздан кечирилганда хорижий ва бошқа электрон крипто-ҳамёнлар орқали 95 мингга яқин транзакция амалга оширилгани, умумий ҳисобда 2 млн 375 минг долларга тенг миқдорда крипто-активлар айланмаси бўлгани аниқланган.
Гумонланувчи шахслардан бири томонидан гиёҳвандлик воситалари, уларнинг аналоглари ва психотроп моддалар савдоси учун яратилган махсус канал ҳам бошқариб келингани аниқланган. Шунингдек, тезкор-қидирув тадбирлари доирасида гумонланувчилардан бирининг хонадони кўздан кечирилганда, унинг яшаш манзилидан 550 дона кучли таъсир қилувчи дорилар топилган.
Мазкур ҳолатлар юзасидан Жиноят кодексининг 278-8-моддаси (крипто-активлар айланмаси соҳасидаги қонунчиликни бузиш), 243- (жиноий фаолиятдан олинган даромадларни легаллаштириш) ва 251-1-моддалари (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят иши қўзғатилиб, гумонланувчиларга нисбатан қамоққа олиш тарзидаги эҳтиёт чораси қўлланган.
