Францияда Шамонда вируси аниқланган биринчи инсон вафот этди. Бундан аввал ушбу вирус фақат қишлоқ хўжалиги ҳайвонларида аниқланган. Бу ҳақда мамлакат ҳукуматитга таяниб, “Sky News” хабар берди.
Франция ҳукуматининг билдиришича, одатда чорва молларини зарарлайдиган Шамонда вируси инсонда аниқланган ва ушбу бемор вафот этган. Мамлакат расмийлари ҳозирда аҳоли учун ҳеч қандай хавф йўқлигини билдирмоқда.
Шамонда вируси асосан “Culicoides” уруғига мансуб майда чивинлар орқали тарқалиши ва асосан йирик шохли чорва молларини зарарлаши маълум. Ушбу касаллик илк бор 1960 йилларнинг ўрталарида Нигерияда аниқланган бўлиб, ўшандан бери Африка ва Япониядаги ҳайвонларда вақти-вақти билан кузатилиб келинган. Илгари бу вирус инсонга ўтмайди деб ҳисобланар эди. Бироқ жорий йилда вирус бир қатор Европа мамлакатларида тарқалган.
Британиянинг Ҳайвонлар ва ўсимликлар саломатлиги агентлиги маълумотларига кўра, август ойида Жерси оралида йирик шохли чорва молларида Шамонда вируси аниқланган бўлиб, ундаги клиник белгилар Европанинг бошқа ҳудудларида кузатилган белгиларга мос келган.
“Бу вируснинг Британия оролларида ва Буюк Британияга бевосита яқин ҳудудда мавжудлигини тасдиқлайди ҳамда унинг шимоли-ғарбий Европа бўйлаб кейинчалик ҳам тарқалиш салоҳиятини кўрсатади”, дейилади Буюк Британия ҳукумати баёнотида.
