Қатар амирининг отаси Шайх Ҳамад бин Халифа Ол Соний 12 июль куни 74 ёшида вафот этди. Марҳумнинг вафоти муносабати билан мамлакатда тўрт кунлик расмий мотам эълон қилинди. Бу ҳақда Al Jazeera хабар берди.
Қатарда мотам тадбирлари 13 июлдан бошланади. Собиқ амирнинг вафоти туфайли давлат идоралари ва жамоат ташкилотларида иш вақтинча тўхтатилган, давлат байроқлари эса яримга туширилган. 1995 йилдан 2013 йилгача Қатарни бошқарган Шайх Ҳамад энергияга бой ушбу мамлакат тараққиётининг асосий меъмори эди.
Унинг ҳукмронлиги даврида давлат иқтисодий, ижтимоий ва маданий жиҳатдан юксалиб, халқаро ҳамжамиятдаги нуфузини мустаҳкамлади. Шайх Ҳамад йирик иқтисодий сармояларга бош бўлди ва кенг кўламли халқаро ҳамкорлик алоқаларини ривожлантирди. Бу эса мамлакатни дунёдаги энг йирик суюлтирилган табиий газ экспортчисига айлантирди.
Бугунги кунда Қатарнинг сиёсий таъсири дунёнинг кўплаб минтақаларига, жумладан, Шимолий Африка, Яқин Шарқ ва Осиёга қадар етиб борган. 2022 йилда Қатар дунёдаги энг кўп томоша қилинадиган футбол турнири — FIFA Жаҳон чемпионатига мезбонлик қилди.
У ҳокимиятда бўлган даврда 1996 йилда Al Jazeera ахборот канали ишга туширилди ва у бир неча йил ичида дунёнинг энг нуфузли медиа тармоқларидан бирига айланди. Шайх Ҳамад даврида, шунингдек, 2004 йилда Қатарнинг биринчи доимий конституцияси эълон қилинди. Аёлларга овоз бериш ва номзод бўлиш ҳуқуқи берилган муниципал сайловлар жорий этилди.
2013 йилда у ҳокимиятни ўғли ва валиаҳди, ўшанда 33 ёшда бўлган Шайх Тамим бин Ҳамад Ол Сонийга топширди. Бу Форс кўрфази араб давлатларининг меросхўр ҳукмдорлари орасида тахтдан воз кечиш билан боғлиқ камдан кам учрайдиган ҳолат ҳисобланади.
