Наманган вилоятида 376 марта йўл ҳаракати қоидаларини бузган ва 330 миллион сўмдан ортиқ жаримаси мавжуд бўлган Lacetti автомобили аниқланди. Бу ҳақда Мажбурий ижро бюроси хабар берди.
Маълум қилинишича, МИБ вилоят бошқармаси ходимлари томонидан қидирувда бўлган транспорт воситаларини аниқлаш тадбирлари давомида мазкур автомобиль топилган.
Қайд этилишича, ҳайдовчига нисбатан йўл ҳаракати қоидаларини бузганлик учун расмийлаштирилган кўплаб жарималар ўз вақтида тўланмагани сабабли ижро ҳужжатлари юритувга олинган. Бироқ автомобиль узоқ вақт давомида аниқланмай келган.
Қидирув тадбирлари натижасида топилган Lacetti аввал йўл-транспорт ҳодисасига учрагани ва ҳозирда деярли яроқсиз ҳолга келгани маълум бўлган.
МИБ маълумотига кўра, автомобилга нисбатан ундириш чораларини кўриш ҳамда уни аукцион савдоларига чиқариш бўйича тегишли ишлар амалга оширилади.
