Ҳуқуқни муҳофаза қилиш органлари томонидан ўтказилган тезкор-қидирув тадбирда ижтимоий тармоқларда давлат амалдорлари ва машҳур шахслар сиймоси орқали реклама қилинган инвестиция платформаси ортида турган ҳамда ноқонуний крипто-активлар айланмаси билан шуғулланиб келган уюшган жиноий гуруҳ фош этилди. Бу ҳақда Тошкент шаҳар ИИББ хабар берди.
Маълум қилинишича, Instagram ижтимоий тармоғи ва Telegram мессенжеридаги “Amina Halol Trading” фойдаланувчиси фуқаролар ишончига кириб, фирибгарлик қилиб келаётганлиги юзасидан олиб борилган тезкор-қидирув тадбирда Олмазор тумани ҳудудидаги кўп қаватли биноларнинг бири текширилган. Натижада ноқонуний крипто-активлар савдоси билан шуғулланиб келаётган бир гуруҳ шахслар қўлга олинган.
Текширувларга кўра, гумонланувчилар амалга оширган P2P операциялари ва ноқонуний криптоайланма ҳажми 1,5 миллиондан зиёд USDT’ни ташкил этган. Маълум бўлишича, жиноий гуруҳ аъзолари 100 дан зиёд Ўзбекистон фуқароларини алдаб, маълум маблағ эвазига Қозоғистонга олиб борган. У ерда уларнинг номига турли банклардан пластик карталар очтирилиб, кейинчалик мазкур карталар крипто-активлар айланмасида фойдаланилган.
Олиб борилган ўрганишлар натижасида ушбу жиноий схеманинг ортида хорижлик фирибгарлар бўлиб, ушбу жиноий ҳаракатларни амалга оширишда ижрочи сифатида Ўзбекистон фуқаролари иштирок этган. Улар арзон ҳақ эвазига ўз номига пластик карта очтириб, уни бошқа шахсларга тақдим этган.
Маълум бўлишича, фирибгарлар реклама ва тарғибот материалларида давлат амалдорлари ва Президент номини суиистеъмол қилиб, аҳолини ишонтиришга уринган.
Мазкур ҳолат юзасидан гумонланувчиларга нисбатан Жиноят кодексининг 278-8-моддаси (крипто-активлар айланмаси соҳасидаги қонунчиликни бузиш) 3-қисми “а” банди билан жиноят иши қўзғатилган.
Билдирилишича, гумонланувчиларга нисбатан қамоққа олиш эҳтиёт чораси танланган бўлиб, ҳозирда ҳолат бўйича тергов ҳаракатлари давом этмоқда.
