Ўзбекистоннинг Нью Йоркдаги бош консулхонаси АҚШ ҳудудида бўлиб турган Ўзбекистон фуқароларини мамлакат қонунчилигига қатъий риоя қилишга чақирди.
Консулхона мурожаатида сўнгги пайтларда оммавий ахборот воситалари ва ижтимоий тармоқларда айрим Ўзбекистон фуқаролари ёки келиб чиқиши ўзбекистонлик бўлган шахслар иштирок этган бўлиши мумкин бўлган ҳуқуқбузарликлар ҳақидаги хабарлар тез-тез учраётгани қайд этилган.
Шу муносабат билан фуқароларга АҚШ қонунлари, маҳаллий анъаналар, маданият ва умумқабул қилинган жамоат тартиби қоидаларига ҳурмат билан муносабатда бўлиш тавсия этилган.
Таъкидланишича, ҳар қандай қонунбузарлик шахсий жавобгарликка сабаб бўлиши билан бирга, АҚШда ҳалол меҳнат қилаётган, таҳсил олаётган ва тадбиркорлик фаолияти билан шуғулланаётган ўзбекистонликлар ҳақидаги умумий тасаввурга ҳам салбий таъсир кўрсатиши мумкин.
Консулхона йирик халқаро тадбирлар ва спорт мусобақалари ўтказилаётган даврда Ўзбекистон ва унинг фуқароларига жамоатчилик ҳамда оммавий ахборот воситалари эътибори янада ортишини ҳам эслатган.
Мурожаатда фуқаролар масъулиятли бўлишга, қонун талабларига амал қилишга ҳамда ҳуқуқий оқибатларга олиб келиши ёки мамлакат ва ватандошлар обрўсига путур етказиши мумкин бўлган ҳаракатлардан тийилишга чақирилган.
Шунингдек, Нью Йоркдаги бош консулхона ўз ваколатлари доирасида фуқароларга зарур консуллик-ҳуқуқий ёрдам кўрсатишга тайёр эканини маълум қилган.
