Жорий йилнинг 18 апрель куни Саудия Арабистонидан Туркия орқали Ўзбекистонга қайтаётган 82 нафар Ўзбекистон фуқаролари Сабиха Гёкчен халқаро аэропортида мураккаб вазиятга тушиб қолди. Бу ҳақда Ўзбекистоннинг Истанбул шаҳридаги Бош консулхонаси хабар берди.
Ўрганиш ишлари давомида маълум бўлганки, улар “Ihlos Travel” ва “Hikmat Travel” номли ҳусусий турустик фирмалар хизматларидан фойдаланган ҳолда “Ар-Риёд — Истанбул — Чимкент-Тошкент” йўналиши орқали умра зиёратини амалга оширишни режалаштирган.
Бироқ томонлар ўзларига юклатилган мажбуриятларни лозим даражада бажармагани сабаб фуқаролар чет элда қийин ҳаётий вазиятга тушиб қолган.
Ҳолат бўйича тегишли идоралар масъуллари билан масалани ҳал қилшга қаратилган музокаралар олиб борилган, шунингдек юқоридаги фирмалар мутасадди ходимлари билан суҳбатлашилган.
Натижада фуқароларнинг вақтинча транзит ҳудудида бўлиши давомида озиқ-овқат, транспорт ва бошқа зарурий товар ҳамда хизматлар билан таъминланишига эришилган. Зиёратчилар келишилган йўналиш бўйича хавфсиз Ўзбекистонга қайтариш ишлари тўлиқ назорат остида амалга оширилган.
