АҚШнинг Луизиана штатидаги Шривпорт шаҳрида 19 апрель тонгида содир бўлган оммавий отишма оқибатида саккиз нафар бола ҳалок бўлди. Бу ҳақда Америка полицияси маълумотларига таяниб, NBC News хабар берди.
Полиция ходимлари Ғарбий 79-кўчанинг 300-кварталига маиший можаро ҳақида келиб тушган хабардан сўнг етиб борган. Шаҳар полицияси матбуот котиби Кристофер Борделон воқеа жойини “кенг ҳудудни қамраб олган” деб таърифлаган – ҳодиса икки уй ва қўшни Ҳаррисон кўчасидаги яна бир уйда содир бўлган.
Ҳодиса оқибатида жами 10 киши жабрланган, улардан саккиз нафари вафот этган. Жабрланганларнинг ёши 1 ёшдан 14 ёшгача бўлган.
Борделоннинг айтишича, жиноятчи воқеа жойидан қочгач, Ғарбий 79-кўча ва Линнвуд кўчаси чорраҳаси яқинида автомобилни ўғирлаган. Шундан сўнг Шривпорт патруль полицияси уни қувиб боришни бошлаган.
Полиция маълумотига кўра, Боссиер округида қувиб бориш жараёнида ҳуқуқ-тартибот ходимлари гумонланувчини отиб ўлдирган. Борделоннинг таъкидлашича, отишмани айнан шу шахс содир этган.
Полиция гумонланувчи ҳақида батафсил маълумот бермаган, бироқ уйдаги болаларнинг айримлари унинг фарзандлари бўлганини билдирган. Отишма сабаблари ҳозирча аниқланмаган.
Шривпорт шаҳри мери Том Арсено воқеа юзасидан шаҳар чуқур қайғуда эканини айтган.
Шаҳар полицияси бошлиғи Уэйн Смитнинг маълум қилишича, отишма маҳаллий вақт билан тахминан соат 06:00 да (Тошкент вақти билан 14:00) содир бўлган ва жами ўн марта ўқ узилган. Ҳозирда полиция қўшимча маълумотларни йиғишда давом этмоқда.
