АҚШ июнь ойида Эроннинг учта ядровий объектларига зарбалар берган эди. Эрон ташқи ишлар вазири Аббос Арақчи 60 фоизгача бойитилган 400 кг уран мазкур объектларда қолаётганини айтди. Бу ҳақда у Al Jazeera’га берган интервьюсида маълум қилди.
“Урушгача биз уларга (бойитилган уранга) тегмаганмиз. Уларнинг аксарияти ер остида, аниқроғи ҳаммаси ер остида ва зарур шарт-шароитлар яратилмагунча уларни ер остидан чиқариб олиш ниятимиз йўқ”, деди вазир.
Сиёсатчи авиаҳужумлар оқибатида “400 килограммнинг қанча қисми” қолганини очиқламади. У АҚШнинг Эрон ядровий объектларига берган зарбаларидан кўрилган зарарни “сезиларли” деб баҳолади. Арақчи нафақат ядровий объектлар бинолари, балки “ускуналар ва машиналар” ҳам вайрон бўлганини айтди.
Шу билан бирга, вазир уранни бойитиш технологияси “йўқ қилинмаганини” таъкидлади.
“Энг муҳими, бизнинг иродамиз йўқолмади, ҳатто ҳужумдан кейин ҳам”, деди Аббос Арақчи.
- АҚШ ва Исроилнинг Эронга зарбалари
13 июнь куни Исроил Эронга кенг кўламли ҳужум бошлади ва бир неча кун давомида асосан ядровий ва ҳарбий объектларга зарбалар берди. Бунга жавобан Эрон Исроилга ракета ва дронлар учирди. АҚШ Исроил томонида туриб урушга киришди ва Эроннинг Фордо, Натанз ҳамда Исфаҳондаги ядровий объектларига зарбалар берди.
24 июнь куни Исроил ва Эрон ўртасида ўт очишни тўхтатиш тўғрисидаги битим кучга кирди. Исроил ҳужумлардан мақсад Эроннинг атом бомбасини яратишига йўл қўймаслик бўлганини айтди. Теҳрон эса бундай қурол яратишга киришмаганини эълон қилди. АҚШ разведкаси ҳам Эрон ядро қуролини яратиш устида ишлаётганига далил топа олмади.
Оқ уй раҳбари Дональд Трамп авиаҳужумлар оқибатида Эрон ядро дастури “бутунлай йўқ қилингани”ни айтди. Халқаро атом энергияси агентлиги (МАГАТЭ) эса 60 фоизгача бойитилган 400 килограм уранни кузата олмаслигини маълум қилди. МАГАТЭ раҳбари Рафаэл Гросси ҳам Эрон уранни ядро қуролини яратиш даражасида бойитганига далиллар йўқлигини таъкидлади.
