Россия президенти Владимир Путин Мудофаа вазирлигининг йиллик кенгайтирилган йиғилишида Европалик сиёсатчиларини кескин танқид қилиб, агар тинчлик музокаралари бўйича АҚШ таклифлари қабул қилинмаса, Россия Украинанинг яна бошқа ҳудудларни куч билан эгаллашини маълум қилди. Бу ҳақда Reuters хабар берди.
Путин ўз нутқида Россия қўшинлари барча фронтларда олға бораётганини таъкидлади. Унинг сўзларига кўра, Москва ўз мақсадларига ё дипломатия, ё ҳарбий куч орқали эришади.
“Агар қарши томон ва уларнинг хорижий ҳомийлари музокаралардан бош тортса, Россия ўзининг тарихий ерларини озод қилишга ҳарбий йўл билан эришади”, деди Россия раҳбари.
Россиянинг таъкидлашича, мамлакат ҳозирда Украина ҳудудининг тахминан 19 фоизини, жумладан, Қрим, Донбасснинг катта қисми ҳамда Херсон ва Запорожье вилоятларини назорат қилмоқда. Киев ва халқаро ҳамжамиятнинг аксарият бу даъвони рад этади.
Европа етакчиларига нисбатан ҳақорат
Россия президенти Европа сиёсатчиларини музокаралардан бош тортаётганликда айблаб, уларни “ёш чўчқалар” деб атади. У Европада Россия гўёки НАТО давлатларига ҳужум қилиши ҳақида васваса кўтарилаётганини сафсата деб атади.
“Мен бир неча бор айтганман: бу ёлғон, сафсата, Европа давлатларига қандайдир хаёлий Россия таҳдиди ҳақидаги мутлақ бемаъниликдир. Аммо бу қасддан қилинмоқда”, дея қўшимча қилди Путин.
2026-йилги режалар: Уруш суръати оширилади
Россия мудофаа вазири Андрей Белоусов йиғилишда 2026 йил учун асосий вазифа ҳужум суръатини ошириш эканини маълум қилди. Тақдим этилган маълумотларга кўра, 2025-йилда Россия уруш учун ялпи ички маҳсулотнинг 5,1 фоизини сарфламоқда.
Белоусовнинг таъкидлашича, Европа давлатлари урушни тугатишга қаратилган уринишларга тўсқинлик қилмоқда ва бу ҳарбий ҳаракатларнинг 2026-йилда ҳам давом этиши учун замин яратмоқда.
АҚШ ҳозиргача Россия ва Украина билан урушни тугатиш бўйича алоҳида-алоҳида музокаралар олиб борган, бироқ аниқ келишувга эришилмаган. Киев ҳудудий ён босишлардан хавотирда ва кучлироқ хавфсизлик кафолатларини талаб қилмоқда.
