Тошкент шаҳар Учтепа тумани Ички ишлар органлари фаолиятини мувофиқлаштириш бошқармаси ҳуқуқбузарликлар профилактикаси бўлими профилактика катта инспектори фуқародан 10 минг доллар олганда ушланди. Бу ҳақда Давлат хавфсизлик хизмати хабар берди.
Маълум қилинишича, инспектор 2025 йилнинг декабрь ойида 1995 йилда туғилган фуқарога тегишли МЧЖ ҳужжатларини сохталаштириш орқали IT-хизмати кўрсатиш эвазига фирибгарлик йўли билан чет эл фуқаросидан 450 минг АҚШ доллари олган 1990 йилда туғилган шахсга нисбатан жиноят иши қўзғатиш ва уни жавобгарликка тортишга ваъда берган. Сўнг ундан ушбу хизмати эвазига ноқонуний равишда 10 минг АҚШ доллари талаб қилган.
Хабарга кўра, ўтказилган тезкор тадбир давомида профилактика катта инспектори фуқародан талаб қилинган пулларни олган вақтида ашёвий далиллар билан қўлга олинган. Терговга қадар текширув давомида жорий йилнинг февраль ойида ички ишлар органлари томонидан МЧЖ билан боғлиқ фирибгарлик ҳолати бўйича жиноят иши қўзғатишни рад этиш тўғрисида қарор қабул қилинган.
Ҳозирда катта инспекторга нисбатан жиноят иши қўзғатилиб, тергов ҳаракатлари олиб борилмоқда.
