Кеча, 2 май куни Навоий вилоятининг Конимех туманида содир бўлган йўл-транспорт ҳодисаси оқибатида 2 киши ҳалок бўлди. Бу ҳақда вилоят Ички ишлар бошқармаси хабар берди.
Қайд этилишича, соат 07:20 ларда Конимех тумани “Карак-ата” ОФЙ ҳудудидан ўтувчи А-379 “Навоий-Учқудуқ” халқаро аҳамиятга молик автомобиль йўлининг 142-143 километрлари оралиғида ҳайдовчи Н.Ж. бошқарувида бўлган Nexia-3 русумли автомобиль “Зарафшон-Навоий” йўналиши бўйлаб ҳаракатланиб келиб, тезликни ошириши оқибатида йўлнинг хавфли бурилиш жойида руль бошқарувини йўқотган. Шундан сўнг, у қарама-қарши томонга чиқиб кетиб, М.А. бошқарувида бўлган SKANIA 114L русумли автомашина билан тўқнашган ва йўл-транспорт ҳодисаси содир қилган.
Оқибатда Nexia-3 русумли автомобиль ҳайдовчиси ва йўловчиси оғир тан жароҳатлари сабаб вафот этган.
Билдирилишича, ҳозирда ҳолат юзасидан жиноят иши қўзғатилиб, воқеа тафсилотларини ўрганиш юзасидан дастлабки тергов ҳаракатлари олиб борилмоқда.
