Хитой суди компаниялар ходимларни фақат сунъий интеллект (СИ) тизимларига алмаштириш мақсадида ишдан бўшатиши мумкин эмаслиги ҳақида қарор чиқарди. Бу ҳақда “Bloomberg” хабар берди.
Нашрнинг ёзишича, суд технологик компаниялардан бири ўз ходимининг иши сунъий интеллект ёрдамида автоматлаштирилгани сабабли лавозимини пасайтиришга рози бўлмаганидан сўнг, уни ноқонуний равишда ишдан бўшатилган деб топган.
Қарорда айтилишича, компаниялар технологик тараққиёт туфайли ходимларни бир томонлама ишдан бўшатиши ёки иш ҳақини камайтириши мумкин эмас. Хитой суди бу қарорни СИ технологияларини ривожлантириш бўйича глобал пойгада қатнашиш билан бирга, ички меҳнат бозорини барқарорлаштиришга қаратилган ҳаракатлар доирасида қабул қилган.
Ханчжоу шаҳар ўрта халқ суди томонидан эълон қилинган баёнотга кўра, Шарқий Хитойдаги технологик компания ўз ходимини СИ жорий этилиши муносабати билан лавозимини пасайтиришдан бош тортгани учун ноқонуний равишда ишдан бўшатган.
“Компания томонидан меҳнат шартномасини бекор қилиш учун кўрсатилган асослар штат қисқартирилиши ёки операцион қийинчиликлар каби салбий ҳолатларга кирмайди, шунингдек, “меҳнат шартномасини давом эттиришни имконсиз қиладиган” ҳуқуқий шартларга ҳам мос келмайди”, дейилади суднинг 28 апрелдаги қарорида.
Суднинг худди шу ишга таянган бошқа баёнотида таъкидланишича, компаниялар технологик ўзгаришларни рўкач қилиб ишчиларнинг маошини бир томонлама кесиб ташлаш ҳуқуқига эга эмас.
Ушбу қарор Хитой компаниялари давлат стратегияси доирасида СИ тизимларини жадал жорий этаётган бир пайтда қабул қилинган. Шу билан бирга, Хитой Коммунистик партияси вакиллари мамлакат иқтисодий секинлашув ва ёшлар ўртасидаги ишсизликнинг юқори даражасига дуч келаётган бир пайтда меҳнат бозоридаги барқарорликка устувор аҳамият беришга тайёр эканликларини билдирган.
