Дунёдаги энг кекса давлат раҳбари ҳисобланган 92 ёшли Пол Бийя Камерун президенти этиб қайта сайланди. Бу ҳақда Камерун Конституциявий кенгашига таяниб, BBC хабар берди.
Бийя сайловда 53,66 фоиз овоз тўплаган ва саккизинчи муддатга сайланган. У яна етти йил давомида Камерунни бошқаради. Пол Биййа 1982-йилдан бери давлат раҳбари лавозимини эгаллаб келмоқда.
Камерунда сайловлар 12 октябрь куни бўлиб ўтди, бироқ натижалар 27 октябрь куни эълон қилинди. Бу жараён учун Конституцион судга 15 кун вақт берилган эди. Марказий сайлов комиссияси овоз бериш тинч муҳитда ўтганини маълум қилди.
Сайловолди кампанияси давомида Биййа фақат битта митинг ўтказган. Кампаниянинг ўн кунини эса у Европада, шахсий ташрифга сарфлаган. Сайловда яна тўққиз нафар номзод иштирок этди, уларнинг иккитаси Бийя тарафдорлари бўлиб, сайловда қатнашиш учун вазирлик лавозимларини тарк этган.
Шу билан бирга, асосий рақобатчи сифатида кўрилган мухолифат етакчиси 71 ёшли Морис Камто июль ойида сайловга қўйилмади. Бу қарорни Конституцион суд ҳам тасдиқлади, аммо мамлакатда кўпчилик буни “рақибни сиёсий майдондан четлатиш учун қилинган ҳийла” сифатида қабул қилди.
2018-йилдаги сайловлардан сўнг Камто ўзини ғолиб деб эълон қилган ва кенг кўламли норозилик намойишларини бошлаб юборганди.
Бийя 2025-йилги сайловларда ҳам асосий номзод сифатида кўрилганди. Аммо мухолифат номзоди ва собиқ вазир Иссе Чирома Бакари якуний натижалар эълон қилинишидан олдин ўзини ғолиб деб эълон қилди. Расмий натижаларга кўра, Чирома 35,2 фоиз овоз тўплаган. У ва унинг тарафдорлари президентни сайловларни сохталаштириш ва қўпол қоидабузарликларда айбламоқда.
